Ааспыт нэдиэлэҕэ, чуолаан от ыйын 11 күнүгэр, Уус Маайа улууһун Петропавловкай нэһилиэгин олохтоохторо социальнай ситим нөҥүө улуус киинигэр сырыы суоҕун туһунан видеонан тахсан иһитиннэрбиттэрэ.
edersaas.ru
Бу дууһа кыланыыта этэ. 40-ча киһи илии баттаабыт суругар быйылгы сыл саҥатыттан 9 км тэйиччи «Уус-Маайа – Петропавловскай – Уус-Маайа» хайысхаҕа оптуобус сылдьыбат буолбутуттан олохтоохтор алта ыйы быһа эрэйдэммиттэрин туһунан суруллубут этэ. Дьон үксэ улуус киинигэр үлэлииллэр эбит. Аны социальнай эбийиэктэр: поликлиника, балыыһа, сбербаан, аптека уо.д.а. бары Уус-Маайаҕа бааллар. Олохтоохтор таксига кэлэ-бара 600 солк. төлүүллэр эбит. Петропавловскайдар Ил Дархан Айсен Николаевка видеонан туһаайыылара SakhaLife интернет-таһаарыыга тахсыбытын кэннэ, икки үлэ күнүн иһигэр көрүллэн баран, бүгүн, от ыйын 15 күнүгэр — бэнидиэнньиккэ, боппуруос сөптөөхтүк быһаарылынна.
— Улуустааҕы дьаһалта бүддьүөтүгэр оптуобус сырыытын хааччыйыыга 1,3 мөл. солк. үбүлээһин көрүлүннэ. Дьону тиэйэргэ анал лицензиялаах «Казаков» ИП оптуобуһа пассажирдары тиэйиэҕэ, — диэн СӨ Транспорт уонна суол хаһаайыстыбатын министиэристибэтэ иһитиннэрдэ.
Тустаах биэдэмистибэ бүгүҥҥүттэн, от ыйын 15 күнүттэн, Уус Маайа — Петропавловскай хайысханан оптуобус сырыыта олохтоммутун туһунан биллэрдэ. Онон саҥата суох тулуйан олорбокко, олохтоохтор бэйэлэрин кыһалҕаларын быһаарсыыга көхтөөхтүк кытталлара сөптөөҕүн уонна үрдүкү былаас уорганнара миэрэни тута ылалларын бу холобур көрдөрөр.
Елена ПОТОЦКАЯ, «Саха сирэ» хаһыат, edersaas.ru
Хаартыска — интернеттэн.