Уус Маайа улууһун киин балыыһатыгар «Өлүөнэтээҕи холбуктаах пароходство» ПАУо ковид отделениетыгар салгын боллуоннарын тиэртэ.
Улуустааҕы киин балыыһа кылаабынай бырааһа Татьяна Рогожина тэрилтэ генеральнай дириэктэрэ Сергей Ларионовка ис сүрэҕиттэн махтанарын биллэрдэ. Кини иһитиннэрэринэн, улууска эпидемиологическай балаһыанньа уустук. Салгыҥҥа (кислородка) наадыйар ыарыһахтар бааллар, ону тэҥэ, эпэрээссийэни оҥорорго туһаныллар.
Татьяны Рогожина быһаарарынан, билигин салгын боллуоннарын тиэрдии боппуруоһа сытыытык турар. Тоҕо диэтэххэ, Амма өрүскэ паром сырыыта тохтообута ыраатта. Ол иһин, өрүс мууһа турар кэмигэр «Өлүөнэтээҕи холбуктаах пароходство» ПАУо салалтата салгын олбохтоох суудуна үлэлиирин хааччыйда.
«Бэрэбиэркэлиир сырыы этэҥҥэ ааста. Алтынньы 20 күнүгэр «Хивус» түөрт рейси оҥорон, Уус Маайатааҕы киин балыыһаҕа 12 боллуону уонна ыарыһахтарга анаммыт контейнердары тиэртэ. Суудуна күн көтө-көтө кыһыҥҥы суол аһыллыар диэри сылдьыаҕа», — диэн Жатайдааҕы флот дириэктэрин солбуйааччы Андрей Ковалёв иһитиннэрдэ.