Ханна даҕаны курааннаан, балаһыанньа тэҥ соҕус курдук эрээри, өрүс уонна үрэх сирдэрдээх улуустарга от үүнүүтэ куһаҕана суох.
Чуолаан илин эҥэр улуустар Уус Маайа сиригэр-уотугар эрэллэрин уураллар. Бу улууска үүнүү хайдаҕын, төһө оттоон эрэллэрин туһунан улуустааҕы тыа хаһаайыстыбатын управлениетын эппиэттээх үлэһитэ Александр Алексеев быһа сибээскэ маннык кэпсээтэ:
– Биһиги улууспут кыстыгы көрсө 3154 туоннаны оттуур былааннаахпыт. Бүгүҥҥү туругунан ходуһаларга 89 киһи, 34 звено, ол иһигэр үс толору мэхэньисээссийэлээх, түөрт ситэтэ суох мэхэньисээссийэлээх, 24 илиинэн оттуур звенолар оттуу сылдьаллар. 60 гектар ходуһа сирэ охсулунна, 30 туонна от сороҕо кэбиһиллэн, сороҕо рулуоннанан, чөкөтүлүннэ. Үүнүү араас, үрдүк сирдэр халтаҥнаабыт буоллахтарына, намыһах сирдэр этэҥҥэлэр. Алдан өрүс уута угуттаан ааспыта, онон эбэ хочото уонна ойоҕос үрэхтэр үүнүүлэрэ үчүгэй, ол эрээри, уулара саҥа түһэн эрэр, аны кууруохтарын наада.
Илин эҥэр улуустартан чурапчылар былырыын оттообут сирдэригэр, Нуотараҕа, кэлиэхтээхтэр. Томполор от атыылаһарга кэпсэттилэр, кинилэргэ анаан Бээлкэчи олохтооҕо Кондратий Винокуров салайааччылаах биир мобильнай биригээдэ оттоон эрэр. Уопсайа улууска үс мобильнай биригээдэ баар. Хаһаайыстыбалар көхтөөхтүк оттуу сылдьаллар, чааһынай ыаллар да хаалсыбаттар. Холобур, Уус Маайа бөһүөлэгин олохтооҕо, 82 саастаах Владимир Никитич Атласов быйыл да «Штиль-55» хотуурун тутан, ходуһатыгар киирдэ, сылгытыгар анаан түөрт туонна оту туруорар баҕалаах.
Раиса Сибирякова, «Саха сирэ» edersaas.ru