Эдьээн нэһилиэгин олохтооҕо Виктор Абрамов сүөһүлэрин кыстатар отун булунан, быйыл 1,5 туонна үүтү туттарар былаанын хайаан да толорор санаалаах.
edersaas.ru.
Кини эдэр сааһыгар «Уус Маайа» сопхуоска оробуочайдаабыта. Сопхуос ыһыллыбытын кэнниттэн, «Дьулуур» бааһынай хаһаайыстыбатыгар тырахтарыыһынан үлэлээн, оҕуруот аһын бөҕөтүн үүннэрбитэ, от бөҕөтүн оттообута. Өссө оскуолаҕа үөрэнэр сылларыгар, Гаврил Атласов салайар Үлэ-сынньалаҥ лааҕырыгар сылдьан, от үлэтин үөрүйэхтэрин баһылаабыта. Биригээдэнэн икки төгүл сопхуоска бастааннар, «Золотое кольцо» путевканан наҕараадаланан, Кавкаһынан уонна Москванан дьаарбайан кэлбиттэрэ.
2016 с. иитэр-үөрэтэр үлэ бэтэрээнэ Роман Атласов көҕүлээһининэн тэриллибит күүлэйгэ сүүрбэччэ киһи кыттыбытыттан Виктор Абрамов иккис миэстэни, 2018 с. ыытыллыбыт күүлэйгэ бастакы миэстэни ылан, улуус бастыҥ охсооччутун аатын сүкпүтэ.
Билигин кэтэх сүөһүлэрин көрөр. Оттооһун ньымаларын баһылаабыт киһи илии хотуурунан охсуллубут от хаачыстыбата быдан ордук диэн, мэлдьи илиитинэн оттуур. Урут, сүөһүтэ элбэх эрдэҕинэ, соҕотоҕун үстүү туонналаах уонча оту туруорара. Быйыл да сэттэ хас оту кэбиһэр былааннаах. Биэс оту номнуо чөкөттө. Уола Николай үлэтиттэн быыс буллар эрэ, кэлэн кэбиһиигэ көмөлөһөр. Хата сиэнэ уол арыый улаатан, эһэтигэр көмө киһитэ буолан эрэр. Ходуһата бөһүөлэктэн ыраах буолан, Виктор Николаевич отууга хоно сылдьан, бэйэтэ оргууй наллаан оттуур.
Ирина Винокурова, Уус Маайа, Эдьээн, «Саха сирэ» edersaas.ru