Уус Маайа улууһун баһылыга Александр Антипин күн аайы кэриэтэ батсаап ситиминэн оройуон олохтоохторугар олох-дьаһах, оперативнай ыстаап коронавируһу бохсууга ыытар үлэтин билиһиннэрэ, сырдата олорор.
edersaas.ru
Бүгүн улуус баһылыга Өймөкөөн улууһугар баахтанан көмүс хостооһунугар үлэлии кэлбит киһи сыстыганнаах ыарыынан ыалдьыбытын холобурдаан туран, биир дойдулаахтарыгар таксинан төттөрү-таары айанныыры тохтотоллоругар өссө төгүл тоҕоһолоон ыҥырда.
— Атын дойдуттан көмүһү хостооһуҥҥа үлэлиир баҕалаах киһи ыалдьыбытынан сибээстээн, биир дойдулаахтарым, улуус уонна киин куорат, ону тэҥэ нэһилиэктэр икки ардыларыгар таксинан сырыыны тохтоторгутугар көрдөһөбүн. Коронавирус пандемията саамай ааҥнаан турар кэмэ. Онон дьиэҕэ олоруу эрэсиимин хайаан да тутуһаргыт наада, — диэн баһылык Александр Антипин Уус Маайа улууһун олохтоохторун ыҥырда.
Маннык ыксаллаах быһыы-майгы буола турар кэмигэр муниципалитет баһылыга дьонун-сэргэтин кытта бииргэ буолан, улуус олохтоохторун түмэр батсаап бөлөҕөр тахсан, билсэ-кэпсэтэ олороро — бастыҥ холобур.
Елена ПОТОЦКАЯ, «Саха сирэ» хаһыат, edersaas.ru
Хаартыска — батсаапка ыытыллыбыт видео-ыҥырыыттан скриншот.