Бу күннэргэ Уус Маайа улууһун баһылыга Александр Антипин Солнечнай бөһүөлэккэ тиийэн, көмүс хостуур тэрилтэлэр салайааччылара сыстыганнаах дьаҥы бохсууга туох үлэни ыыталларын кытта билистэ.
edersaas.ru
Улуус дьаһалтатын пресс-сэкирэтээрэ Юрий Таюрскай иһитиннэрбитинэн, көмүс хостооһунугар үлэлиир тэрилтэлэр салайааччылара саҥа кэлбит дьон испииһэгин тута «Солнечнай бөһүөлэгэ» муниципальнай тэриллии дьаһалтатыгар биэрэн иһэллэр эбит. Кэлбит дьону 14 хонукка эбэһээт «самоизоляцияҕа» олордон баран, үлэлиир учаастактарыгар тиэрдэллэр.
Улуус баһылыга Александр Антипин көмүс хостуур тэрилтэлэр салайааччыларын кытта сирэй олорон кэпсэттэ, көмүс сууйуутугар бэлэмнэнии үлэ хаамыытын билистэ.
Салайааччылар «өскө коронавирустаах киһи булуллар түбэлтэтигэр саамай эппиэтинэстээх кэмҥэ үлэбит барыта атахтанарыгар тиийэр. Онон биһиги бөһүөлэкпитигэр саҥа киһи кэллэ да, олус кичэллээхтик бары ирдэбиллэри толоробут» диэн бэлиэтээтилэр.
Бу күннэргэ Уус Маайа улууһун кыраныыссатыгар ГИБДД үлэһиттэрэ таһыттан киирэр дьону хантан кэлбиттэрин, туох-сыаллаах соруктаах айанныылларын кытаанахтык хонтуруоллууллар.
Онон улууска сыстыганнаах ыарыыны бохсууга олус күүстээх үлэ ыытыллар.
Муниципалитет баһылыга Александр Антипин Уус Маайа улууһугар коронавируһу бохсууга ыытыллар үлэни, күннээҕи балаһыанньаны, олох-дьаһах сонунун кэмиттэн кэмигэр иһитиннэрэр-биллэрэр тиһик нөҥүө тахсан билиһиннэрэ олорор.
Елена ПОТОЦКАЯ, «Саха сирэ» хаһыат, edersaas.ru
Хаартыска «Уус Маайа улууһа (оройуона)» МТ сайтыттан уонна видеоматырыйаалларыттан.