Уус-Маайа улууһугар уһун үйэлээх кырдьаҕас үгүс. Кинилэртэн саамай аҕа саастаахтара ытык кырдьаҕас Гаврил Исаков.
edersaas.ru
Гаврил Еремеевич быйыл кулун тутар 5 күнүгэр 101 сааһын туолбут. Тапталлаах аҕаларын икки кыыһа көрөллөр-истэллэр.
Ытык кырдьаҕас Уус Маайа оройуонугар аатырбыт булчут. Ордук тайаҕы бултуурунан биллэ-көстө сылдьыбыт. Булчуттар куоттарбыт кыыллара хайа диэки куоппутун, тыал ол кэмҥэ хантан үрэрин, төһө түргэнник куоппутун сиһилии ыйыталаһан баран, сотору кэминэн бултаан аҕалан, дьонун соһутара эбитэ үһү. Дойдутун сирин-уотун оннук үчүгэйдик билэр эбит. Оҕонньор оҕолоругар кэпсээбитинэн, олоҕун устата сүүсчэкэ тайаҕы бултаабыт. Ол булдун үксүн Аҕа дойду Улуу сэриитин сылларыгар анаан сонордоһон охторбут. Сэрии сылларын оҕолоро ахталларынан, «Кыһыл Маяк» холкуос дьоно кини баар буолан хоргуйууттан быыһаммыттар.
Сэрии буолар сылыгар Гаврил Исаков 23 саастаах эбит. Аармыйаҕа ыҥырыллан баран, уҥуох түбүркүлүөһэ буолан, сыыйыллыбыт. Оттуу сылдьан акка бырахтаран, кэтэҕинэн бэрэбинэҕэ тиийэн түспүт. Онтон ыла сыыйа кырдьаҕас икки хараҕынан мөлтөөн, устунан көрбөт буолбута 26 сыл буолбут. Билигин күнү-дьылы: «Киэһэ дуу, сарсыарда дуу?» диэн ыйыталаһан билэр.
Гаврил Еремеевич 92 сааһыгар диэри оҕолоругар көмө киһитэ буола сылдьыбыт. Ол курдук, чугас олорор сиэнин тахсан оҕолоһор эбит. Ытык кырдьаҕас кэргэнэ өлбүтэ 27 сыл буолбут. Бу күннэргэ оҕолоро уонна чугас аймахтара мустан, ийэлэрэ Матрена Дмитриевна төрөөбүтэ 100 сылын бэлиэтээтилэр. Оҕонньор аҕыйах сыллааҕыга диэри хаамар тренажердаах эбит. Онто билигин хоһугар турар.
Уус тыллаах кырдьаҕас бэргэн тылларын кыргыттара суруна сылдьаллар. Кини 100 сааһын туоларыгар «Сири киэргэтэн олоруҥ!» диэн бэртээхэй этиитин ыланнар, олорбут тапталлаах Күбээйитигэр анаан истиэнэни биир кына ылар хартыынаны анаан уруһуйдаппыттар уонна онно суруйтарбыттар. Бу кэрэ айылҕалаах дойду кэнэҕэс Гаврил Еремеевич ыччаттарыгар күндү өйдөбүл буолара чахчы.
— Төрөппүттэрбит аҕыс оҕону төрөтөн, 53 сыл дьоллоохтук олорбуттара. Аҕабыт үтүмэн элбэх сиэннэрин, хос сиэннэрин хайдах олороллорун өрүү ыйытан, билэ олорор, — диэн кэпсиир улахан кыыһа, педагогическай үлэ бэтэрээнэ Галина Егорова.
«Көрбөт буолан эрэйдэнэрэ буолуо. Санаата тууйуллубат дуо?» — диэн ыйыппыппар кыыһа: «Наһаа сэргэх оҕонньор. Сарсыарда аайы бэйэтэ кэпсэтэр тиэмэлээх буолааччы. Холобур, бүгүн сарсыарда суруналыыс кэлэрин сэрэйбит быһыылаах, тыл суолтатын туһунан кэпсэттибит. Сиэннэрин: «Ханнык тылынан (сахалыы дуу, нууччалыы дуу) саҥаралларый?» —— диэн ыйытар. «Төрөөбүт тылларын олох умуннарымаҥ», — диэн сүбэлиир.
Ити курдук, улуус киинигэр, Уус Маайа бөһүөлэгэр, 101 саастаах ытык кырдьаҕас оҕолорун уонна сиэннэрин тапталларыгар бигэнэн дьоллоохтук олорор.
Елена ПОТОЦКАЯ, «Саха сирэ» хаһыат, edersaas.ru
Ааптар хаартыскаҕа түһэриитэ.