Уус Маайа улууһа (баһылык Александр Антипин) кыстыгы көрсө, 2 900 туонна оту оттуур былааннаах.
edersaas.ru
Киин уонна илин эҥэр улуустарга курааннаабыта биһиэхэ эмиэ дьайда. Тыа хаһаайыстыбатын улуустааҕы управлениетын начаалынньыгын э.т. Александр Кириллин иһитиннэрбитинэн, Петропавловскай нэһилиэгэр үүнүү былырыыҥҥытыгар тиийбэт. Быйыл саас өрүскэ уу кэлиитэ мөлтөх буолан, сыһыылар угуттаммакка хаалбыттар, инньэ гынан, урут биир гектар ходуһаттан ортотунан 1,5 туонна от кэлэр эбит буоллаҕына, быйыл биир туонна эрэ от курдугу ылбыттар.
Алдан өрүс уҥуор баар Троицкай отчуттара былырыын ылбыт отторун аҥаарын эрэ ылбыттар. Инньэ гынан, өтөрүнэн оттоммокко, быраҕыллан сыппыт ходуһаларга киирбиттэр. Эдьээн нэһилиэгэр уу ходуһалары угуттаан баран, өр сыппыт, аны түспүтүн кэннэ халлаан итийбэккэ, үчүгэйдик үүммэтэх, ааспыт сылларга биир гектартан 1, 5 туонна оту ылар сирдэриттэн 1,2 туонна оту ылбыттар. Нуотара үрэх да хочотугар кураан биллибит, Күп хаһаайыстыбалара биир гектарыттан 1,8 туонна от кэлэр ходуһатыттан 1,5 туонна оттообуттар. Ол да буоллар, тыа үлэһит дьоно сүөһүлэрин-сылгыларын кыстатар отторун хааччынар соруктаах үлэ үөһүгэр сылдьаллар. Атырдьах ыйын 10 күнүнээҕи туругунан, улуус үрдүнэн 2 700 туонна от кэбиһиллэн, былаан 85 %-на толорулунна. Былааннарын Күп нэһилиэгэ 100 %, Эдьээн 58 % толордулар. Саппааска оттуур Герман Трифонов сорудаҕын куоһарда, 200 туонна оту чөкөттө.
Чурапчылар кэлиэхтэрэ
Урут, холкуос уонна сопхуос саҕана, илин эҥэр улуустар хаһаайыстыбалара Уус Маайа сиригэр-уотугар, чуолаан Нуотараҕа көһөн тахсан, оттуур итиэннэ сүөһүлэрин үүрэн аҕалан, үрдүттэн кыстыыр идэлээхтэрэ. Бу кэлиҥҥи сылларга ыаллыы Чурапчы улууһуттан биир нэһилиэк хаһаайыстыбата кэлэн оттообута. Быйыл курааннаан, бу улуустан хас да мобильнай биригээдэ кэлэрэ быһаарыллыбыт. Онно анаан, улуус баһылыга Александр Антипин дьаһалынан, Нуотара үрэх улууска киирэр баһыгар оттуур сир тыырылынна.
Евсей Лугинов, Уус Маайа.