Кэлиҥҥи кэмҥэ эдэр дьахталлар, ыал ийэлэрэ бэйэлэрэ уһанан, тиэргэннэрин киэргэтэллэрин туһунан суруйууларым, туһугар, киинэ сэрийээлин курдук буолла.
edersaas.ru
Мин уһанар дьахталлары анаан көрдөөбөппүн. Интервью ылар кэммэр сэһэргэһээччим хайаан да бэйэтэ уһанара биллэн тахсар. Бу да сырыыга оннук буолла.
Горнай улууһун Орто Сурт нэһилиэгин олохтооҕо Сахая Илюхинаны, нарын-намчы бэйэлээх элбэх оҕолоох эдэр ыал тапталлаах ийэтин, киһи хайдах да алта оҕолоох (түөрт уоллаах, икки кыыстаах) дии санаабат. Өссө эбиитин уһанар!
Уустартан сыдьааннаах
— Тиэргэниҥ төһө киэҥий? Оҥоһууҥ барыта бэйэҥ уһаныыҥ түмүгэ дуо?
— Тэлгэһэм иэнэ сүүрбэ суотай. Тиэргэним оҥоһуга барыта бэйэм киэнэ. 2018 сылтан лобзигынан быһан араас тэрили, киэргэли оҥорон саҕалаабытым. Билигин бу саамай сөбүлүүр дьарыгым буолла. Эһэм Василий Самсонович маһы ыллатар уус киһи этэ. Онон хааммытыгар баар диэххэ сөп. Убайдарым эмиэ уһаналлар. Онон уһаныыга мээнэ ылсыбатаҕым болуо диэн сэрэйбин. Оскуолаҕа черчениеҕэ «4» уонна «5» сыанаҕа үөрэммитим. Ол уһаныыны кытта эмиэ ыкса сибээстээҕэ чахчы.
Ыараханы таһыы уустук, онтон атына – бэйэм киэнэ
— Дьахтар уһанара эр киһиттэн туох атыннааҕый?
— Улахан уратыта суох курдук. Арай ыараханы таһарга, көтөҕөргө ыарахаттардаах буолааччы. Оннук түгэҥҥэ «эр киһи курдук күүстээҕим буоллар даа…» диэн санааччыбын. Үксүгэр кэргэммин уонна уолаттарбын көмөлөһүннэрэбин. Фанерабын кинилэр киллэрэн-аҕалан биэрэллэр. Ону сосуһуох диэтэххэ, уустук. Онтон атына – бэйэм киэнэ, кыанабын.
Уһаныыга дьахтар ылыста
— Кэлин уһанар дьахталлар наһаа элбээтилэр дии. Ол тугу кытта сибээстээҕэ буолуой?
— Аныгы үйэ буолан, дьахтар киһи туттарыгар чэпчэки, табыгастаах тэрил арааһа баар буолла. Аны идэҕинэн үлэ да көстөрө уустук курдук. Оҕотун көрөн олорор дьахтар чуҥкуйумаары уһанара, туттара-хаптара эмиэ үгүс. Кыраһыабай оҥоһуктары оҥорон, атыылаан, дьиэ кэргэн бүддьүөтүгэр эбии буоллаҕа. Онон тутуу, уһаныы «эр киһи эрэ үлэтэ» буолбатаҕа көстөн эрэр. Тиэргэммитин дьахтар аймах бэйэбит толкуйдаан тупсарар буоллахпыт.
… Ити курдук, Сахая Илюхина оҥоһуктара Маҥаны ыалларын тиэргэннэригэр бэйэлэрин миэстэлэрин булан, нэһилиэк ис көстүүтүн олуһун киэргэтэллэрин саарбахтаабаккын. Маны этэн эрдэхтэрэ – саха дьахтара тугу сатаабатаҕа баарай диэн!
Елена ПОТОЦКАЯ, «Саха сирэ» хаһыат, edersaas.ru