Бэҕэһээ, муус устар 13 күнүгэр, ыкса киэһэ Канада Эдмонтон куоратыттан 30 бизону тиэйбит сөмөлүөт көтөн кэллэ.
edersaas.ru
Өрөспүүбүлүкэҕэ бизоннары аан бастаан 2006 сыллаахха Канада “Элк-Айленд” айылҕа пааркатыттан аҕалбыттара. Бу төрдүс аҕалыы буолар. Икки сыл устата тустаах министиэристибэлэр, тэрилтэлэр сыралаһан үлэлээбиттэрин, улахан бэлэмнэнии үлэтин ыыппыттарын түмүгэр, бу норуоттар икки ардыларынааҕы тэрээһин кыаллыбыт.
Билигин өрөспүүбүлүкэҕэ үс питомник баар – Хаҥаласка «Уус-Буотама», Горнайга «Тыымпынай» уонна Сунтаар Кэмпэндээйитигэр. Саҥа кэлбиттэри эптэххэ, барыта 250 төбө буолла. Бизоннар Саха сирин тыйыс усулуобуйатыгар сөп түбэһэн, сылгы курдук хаһан аһыыллар, сыл аайы төрүөх биэрэллэр. 2017 уонна 2018 сылларга отуттуу төбөнү “Сиинэ” айылҕа пааркатын сиригэр-уотугар көҥүл ыыппыттара. Ону тэҥэ, 2019 сыллаахха бизоннары СӨ Кыһыл Кинигэтигэр киллэрбиттэрэ.
Быйыл аҕалбыт бизоннара балтараа саастаах тыһаҕастар, 15-һэ тыһы, 15-һэ атыыр. Кинилэри киэһэ Хаҥалас улууһун “Уус-Буотама” питомнигар ыыттылар. 21 чаастаах уһун көтүүнү этэҥҥэ тулуйбуттар. Бу иннинэ биир ый харантыыҥҥа туппуттар, бэтэринээрдэр бэрэбиэркэ бөҕөтүн ыыппыттар.
Бизоннары Канада бырабыыталыстыбата бэлэх биэрбит. Биллэрин курдук, бизонна Саха сиригэр түҥ былыр олоро сылдьыбыттар, 5 тыһыынча сыллааҕыта эстибиттэр эбит.
— Канадаҕа билигин 400 бизон баар. Аҕыйах сылынан биһиги бу ахсааны куоһарыахпытын сөп. Аан дойду айылҕатын, экосистиэмэтин чөлүгэр түһэрэргэ биһиги бэйэбит кылааппытын киллэрэбит, — диэн Ил Дархан Айсен Николаев бэлиэтээтэ.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru