Улуу олоҥхоһуттар үгүс көлүөнэ дьоннорун үөскэтэн-төрөтөн, уһун үйэлэргэ аатырдыан аатырпыт, суон сурахтарын сураҕырпыт, саха түөлбэлээн олорор Уус Алдан дьоно-сэргэтэ бу күннэргэ улуус киин болуоссатыгар көмүстээх Алдаҥҥа ыытыллыбыт XII өрөспүүбүлүкэтээҕи Олоҥхо ыһыаҕар ситиһиилээхтик кыттыбыт биир дойдулаахтарын үөрүүлээх быһыыга-майгыга чиэстээтилэр.
edersaas.ru
Быйылгы Олоҥхо ыһыаҕар Иннокентий Сыроватскай тылларыгар, Василий Парников мелодиятыгар, Николай Орлов хорга тупсаран оҥоруутугар Уус Алдан киэн туттуута — «Кэнчээри» Арассыыйа үтүөлээх кэлэктиибин толоруутугар «Олоҥхо Гимнэ» ыһыах регламеныгар киирэн ылламмыта. Саха омук төрүт үгэстэрин сайыннарыыга, тарҕатыыга үтүө кыһамньыларын иһин махтанан, биир дойдулаахтара, Ил Түмэн спикерэ Александр Жирков кэнчээри ыччакка эҕэрдэ тэлэгирээмэ ыытта.
Култуура управлениетын кылаабынай исписэлииһэ Анна Федорова иһитиннэрбитинэн, үөрүүлээх тэрээһиҥҥэ улуустааҕы Олоҥхо Ассоциациятын бэрэссэдээтэлэ, улуус баһылыгын солбуйааччы Михаил Борисов, үөрэх управлениетын салайааччыта Ирина Тарская, култуура управлениетын начаалынньыга Иннокентий Аммосов кыайыы өрөгөйүн билбит дьоммутугар улуус дьаһалтатын баһылыга Алексей Федотов эҕэрдэ суруктарын, ону таһынан, харчынан сертификаттары туттардылар. Ол курдук, «Кылаан бириис хаһаайыттарыгар» тимир ууһа Илларион Поповка, оҕолорго олоҥхону биирдиилээн толорууга уонна оһуохайга күрэх кыайыылаахтарыгар Диана Петуховаҕа – 20-лии тыһ. солк. суумалаах сэртипикээттэри туттардылар. Диана бу күн 40 000 солк. суумалаах сэртипикээт хаһаайкатынан буолла.
Маны таһынан, кылаан бириис хаһаайыттарыгар, Лөгөй орто оскуолатын «Кулуһун» бөлөх салайааччытыгар Зинаида Лугиноваҕа Ил Түмэн Бэрэссэдээтэлэ Александр Жирков сэмэй бэлэхтэрин туттардылар.
1 миэстэ хаһаайыттара – 15 тыһ.солк., 2 миэстэни ылбыттарга – 10 тыһ. солк., 3 миэстэ буолбуттарга 5 тыһ. солк. суумалаах сэртипикээттэри туттардылар.
Үс көлүөнэ олоҥхону толорооччулар: эдэр көлүөнэ — Диана Петухова, орто көлүөнэ — Антонина Лугинова, аҕа саастаах көлүөнэ бэрэстэбиитэлэ — Семен Черноградскай өрүү күүс-көмө, өйөбүл буолар улууспут баһылыгар, Олоҥхо ассоциациятыгар, үөрэх, култуура управлениеларыгар махтал истиҥ тылларын эттилэр.
Иистэнньэҥнэр Ольга Колодезникова уонна Иван Окоемов тикпит таҥастара эмиэ бэлиэтэннэ.
Бэрт Ууһун нэһилиэгин маастардара Алдаҥҥа буолбут Олоҥхо ыһыаҕар бэйэлэрин үлэлэрин көрдөрөн кэллилэр.
Мүрү нэһидиэгин айар куттаахтара төрөөбүт улуустарын чиэһин эмиэ көмүскээтилэр.
Бу үөрүүлээх түгэҥҥэ норуоту түмэр, сомоҕолуур, күүс-уох биэрэр оһуохайы быйылгы Олоҥхо ыһыаҕын оҕолорго оһуохайга күрэҕин кыайыылааҕа Диана Петухова таһаарда.
— Норуот тылынан уус-уран айымньытын чыпчаалынан буолбут олоҥхобут үйэлэргэ ыллана, Олоҥхо ыһыахтара аны да ыытылла турдуннар. Улууспут аатын дорҕоонноохтук ааттаппыт биир дойдулаахтарбытыгар, олоҥхо биһигэ — Уус Алдан талба талааннаахтарыгар уруй-айхал буолуохтун! – диэн кэпсээнин түмүктүүр култуура управлениетын кылаабынай исписэлииһэ Анна Федорова.
Олоҥхо Ыһыаҕын кыайыылаахтарыгар биир дойдулаахтара инникитин саҥа кыайыыларга ситиһии кынаттананан, уостан түспэт кэпсэлгэ сылдьалларыгар баҕардылар.
Анжелика АЛЕКСЕЕВА, «Саха сирэ» хаһыат, edersaas.ru
Хаартыскаҕа Любовь Петухова, Уйбаан Бахсылыырап түһэриилэрэ.