Нэһилиэктэргэ холобур буолар ураты күрэхтэһии Уус Алдан Мүрүтүгэр буолла. «Тупсаҕай көстүүлээх олбуор» күрэхтэһии кыайыылаахтара 100 тыһ. солк. уу харчынан наҕараадаланнылар. edersaas.ru
Бу күрэхтэһиини 2017 сыл саҕаланыыта Мүрү нэһилиэгин баһылыга Василий Аммосов биллэрбитэ. Онуоха Мындааба бөһүөлэгин биир талааннаах, дьоҕурдаах ыала Марфа Николаевна уонна Владимир Николаевич Оконешниковтар кыттан, ааспыт сайыны быһа тиэргэннэрин киэргэттилэр, оҥордулар. Элбэх оҕолоох, сиэннээх Оконешниковтар эрдэттэн үбү ааҕан-суоттаан, бэйэлэрин сатабылларынан, харыларын күүһүнэн сиэдэрэй тутуу бөҕөнү туттулар, олбуордарын тупсардылар. Онон, саарбахтааһына суох, биллэриллибит күрэхтэһиигэ бастааннар, 100 тыһ. солк. уу харчы наҕараадаҕа тигистилэр.
Сылын аайы маннык ботуччу суумалаах күрэҕи ыытан, дойдубут дьоҕурдаах ыаллара кыттан, дьиэлэрин-уоттарын аныгылыы тупсарынан, төрөөбүт сирбит кэрэ көстүүлээх олбуорданан, кыраһыабай тутуулардаах дьиэлэринэн, көҕөрдүүнэн тупсан сандаарара буоллар.
edersaas.ru сайтка анаан «Эйгэ» Мындааба бэтэрээннэрин сүбэтэ.