Уус Алдан уран тарбахтаах ууһа Николай Пестряков Борис Неустроевка-Мандар Ууска анаан, тимир уустарын бэлиэтин — кыстык үрдүгэр олорор суору маһынан оҥорон бэлэхтээбит. Бу туһунан улуустааҕы култуура управлениетын кылаабынай исписэлииһэ Мотрена Герасимова иһитиннэрдэ.
—Николай Пестряков үөлээннээҕэр ис сүрэҕиттэн үчүгэйи баҕаран, бу кыһыны быһа анаан чочуйбут, бэлэмнээбит бэлэҕэ. Бу бэлэҕи туттарарга улууспутуттан тимир, мас уустара уонна төрөөбүт дойдутугар быыстапкатын оҥоро кэлбит муосчут Александр Винокуров, барыта уонча буолан баран кэллилэр. Кинилэр Мандар Ууһу көрсөн, тылын-өһүн, сүбэтин-аматын истэн улаханнык астыннылар, — диир Мотрена Николаевна. Уус Алдантан Тааттаҕа барыыга-кэлиигэ улуустааҕы култуура управлениета көлөнөн хааччыйбыт.
Уус Николай Гаврильевич Пестряков
Өлтөх нэһилиэгин Арыылаах олохтооҕо. СӨ үөрэҕириитин туйгуна. Үлэтин 1960-с сыллартан Орто Эбэ оскуолатыгар үлэ учууталынан саҕалаабыт. 1973 сыллаахха үөрэнээччилэрин кытта Москубаҕа Норуот хаһаайыстыбатын ситиһиилэрин быыстапкатыгар кыттан кыһыл көмүс чаһынан бэлиэтэммит.
Николай Гаврильевич мындыр рационализатор. Тыа хаһаайыстыбатын үлэтин чэпчэтэр туһуттан, тиэхиньикэ 14 көрүҥүн айан оҥорбут. Олор бары билигин күннээҕи олоххо туттулла сылдьаллар диэн дойдулаахтара киэн туттан кэпсииллэр.
Кэнники сылларга Николай Пестряков муус, хаар скульптуралары оҥоруунан утумнаахтык дьарыктанар. Нэһилиэгэр, өрөспүүбүлүкэҕэ, Арассыыйаҕа, аан дойдуга ыытыллар күөн күрэстэргэ ситиһиилээхтик кыттар. Ол курдук, кини оҥоһуктара Хабаровскай, Нерюнгри, Дьокуускай, Харбин (КНР) куораттар болуоссаттарын киэргэппиттэр.
2013 с. сайын улууска ыытыллыбыт ат симэҕин көрүүтүгэр Өлтөх нэһилиэгэ бастакы миэстэни ылбыт. Николай Гаврильевич оҥорбут ыҥыыра Туймаада, Майаҕа Олоҥхо уонна улуус ыһыахтарыгар “Бастыҥ ыҥыыр” аатын ылбыт.
Николай Пестряков “Мындыр” (сал. улуустааҕы култуура управлениетын нач. И.И.Аммосов) улуус уран тарбахтаахтарын түмсүүтүн чилиэнэ.
Биһиги корр., “Саха сирэ” хаһыат, edersaas.ru
