Кураан буолан, өрөспүүбүлүкэ таһыттан от атыылаһар туһунан кэпсэтиилэр саҕаланнылар.
Тыа хаһаайыстыбатын миниистирин солбуйааччы Николай Афанасьев Амур уобалаһыгар сырыытын түмүгүнэн, бу уобалас салалтата Мазановскай, Зейскэй, Шимановскай, Сковородинскай оройуоннары Саха сирин кытары үлэлэһэргэ эппиэттээхтэринэн анаабыта. Онон Чурапчы, Уус Алдан, Өлүөхүмэ уонна Томпо улуустарын дэлэгээссийэлэрэ ол оройуоннарга тиийэн, от атыылаһар эбэтэр сир түүлэһэн оттуур туһунан кэпсэтиэхтээхтэр. Магадан уобалаһыттан Өймөкөөн улууһа 2000, Томпо улууһа 250 т оту атыылаһарга суоттаналлар.
Кураантан саамай улаханнык эмсэҕэлээбит Уус Алдан улууһа сүөһүтүн-сылгытын кыстатар отун 46 %-ын эрэ хааччынар туруктаах. Хаһаайыстыбалартан 16,5 тыһ. т оту атыылаһарга 977 сайаапка киирбит. Бу нэдиэлэҕэ баһылык Алексей Федотов салайааччылаах Уус Алдан улууһун дэлэгээссийэтэ Амур уобалаһыгар тиийэн, хаһаайыстыбалар салайааччыларын кытары көрсөн, 7370 т оту атыылаһарга барыллаан дуогабардары түһэрсибитин, аны салгыы аҕыс хаһаайыстыбаҕа сылдьыахтааҕын туһунан дьаһалта пресс-сулууспата иһитиннэрэр.
Тыа хаһаайыстыбатын министиэристибэтин от ыйын 27 күнүнээҕи чахчытынан, күн бүгүн бу улууска 6457 гектар иэннээх ходуһа сирэ охсуллубут, 3184 т от кэбиһиллибит (былырыын баччаларга 7694 т кэбиһиллибитэ), ити иһигэр мобильнай биригээдэлэр ыраах учаастактарынан, үрэх бастарынан 414 туоннаны оттообуттар.
Раиса Сибирякова, «Саха сирэ», edersaas.ru