Уус Алдан таксистара элбэх оҕолоох ыалларга Саҥа дьылынан бэлэх ууннулар

Бу чааска Уус Алдан улууһун «Көҥүл Боотурдар» диэн такси сулууспатын таксистара элбэх оҕолоох ыалларга Саҥа дьыллааҕы аһымал аахсыйатын оҥорон, бородууктанан бэлэх оҥорбуттарын туһунан үтүө сонун социальнай ситимнэринэн тарҕанна.

edersaas.ru

Ол курдук, эдэр дьон 5 тыһ. солк. бэлэххэ: мандарин биэдэрэтин, 5 кг риһи,  10 кг саахары,  10 кг бурдугу, 5 кг мокоруон аһы, 5 кг гречканы, 5 уст. мас арыытын,  5 устуука эт кэниэрбэтин, 2 бааҥка кэнсиэрбэлэммит оҕурсууну уо.д.а минньигэс аһы укпуттар.

Үтүө санаалаах уолаттарга  дьон: «Таҥара кинилэргэ уон оччонон көмөлөстүн, санаабыт баҕа санаалара барыта туоллун!» — диэн батсаап бөлөҕүн аайы алгыы олороллор.

Бу маннык сырдык санаалаах ыччаттардаахпытынан киэн туттабыт. Уус-алданнар холобурдара улуустарынан батыһыннарыылаах буоллун. Бүгүн бу таксистар төрөөбүт дойдуларын дорҕоонноохтук ааттаттылар. Кырдьык да, үтүө ыччаттардаах эбит Уус Алдан улууһа!

Елена ПОТОЦКАЯ, «Саха сирэ» хаһыат, edersaas.ru

Хаартыска — батсааптан