Уус Алдан улууһун Суотту сэлиэнньэтигэр Кыайыы күнүн көрсө уонна Экология сылынан ырааһырдыы үлэтэ түөлбэлэринэн көхтөөхтүк барда.edersaas.ru
Былытынан бүрүллэн турбут халлаан сайыҥҥылыы чэмэлийэн, үлэҕэ дьону угуйда. Ол курдук, аҥаардас «Төрүт» түөлбэттэн 60-ча киһи түөрт хамаандаҕа арахсан, өрө күүрэн туран үлэлээтэ.
Нэһилиэк баһылыга Василий Иванов субуотунньукка бэйэтинэн тахсан, биир дойдулаахтарын үлэҕэ көҕүлээтэ. Василий Иннокентьевич кэлбит-барбыт киһи хараҕын аалан биэрбит сымара тааһы тобугар диэри көтөҕөн көрдө, онтон тыраахтар хомуоһугар үҥкүрүтэн илдьэн, эдэрдии эрчимин ыһыктыбакка сылдьарын итэҕэттэ. Көр-күлүү, сөҕүү-махтайыы дьэ манна буолла.
Айан суолун аартыгар сытар Суотту нэһилиэгэ тупсарыы, ырааһырдыы үлэтэ тиһигин быспакка ыытылларын эрэйэр. Онон, бииргэ түмсүбүччэ, быйыл Экология сылынан көҕөрдүү, эргэ дьиэлэри көтүрүү үлэлэрэ ыытыллыахтаахтарын, оҕо былаһаакката тутуллуохтааҕын былааннаатылар.
«Бары биир киһи курдук тахсан элбэҕи да оҥордубут! Бэл салгыммыт ырааһырбыт курдук буолла. Тупса, чэчирии тур, тыам сирэ барахсан», – диэн үлэттэн дьолломмут дьон астынан тарҕаста.
Надежда ЕГОРОВА, «Саха сирэ» хаһыат, edersaas.ru