Аҕыйах хонуктааҕыта Кэбээйигэ буолбут мас тардыһыыга өрөспүүбүлүкэтээҕи федерация Кубогар Уус Алдан хамаандата үһүс сылын субуруччу кыайыылааҕынан таҕыста. Онон көһөрүллэ сылдьар Кубогы үйэ-саас тухары илдьэ хаалла. Майаҕатта Бэрт Хара удьуордара түмүк күөн көрсүһүүгэ Мэҥэ Хаҥалас хамаандатын 18:9 ахсаанынан хоттулар.
Быйылгы күрэхтэһиигэ барыта 191 мадьыны, ол иһигэр 32 спорт маастара, 36 маастарга хандьыдааттар бааллара.
“А” бөлөххө уус-алданнар, аммалар, бүлүүлэр уонна намнар, «В» бөлөххө үөһээ-бүлүүлэр, мэҥэлэр, чурапчылар, дьокуускайдар наарданнылар. Кэбээйи хамаандата хаһаайын быһыытынан иккис бөлөххө киллэриллэн биэрдэ.
Бөлөхтөрүгэр иккис буолбут Амма уонна Чурапчы хамаандалара үһүс миэстэ иһин күөн көрүстүлэр. Манна чурапчылар 14:12 ахсаанынан кыайыылаах таҕыстылар. Киһилэрэ итэҕэс кыттыбыт аммалар, төһө да биэс очукуону утарсааччыларыгар тута “бэлэхтээтэллэр”, дьоһуннук кииристилэр.
Оттон Кубок хаһаайынын быһаарар түмүк киирсиигэ Уус Алдан уонна Мэҥэ Хаҥалас мадьынылара утарыта таҕыстылар. Манна икки өттүттэн уолаттар уонна дьахталлар эрбии тииһинии тэҥҥэ киирсибит буоллахтарына, эр дьоҥҥо уонна бэтэрээннэргэ кэлэн мэҥэлэр мөлтөөн-ахсаан биэрдилэр.
Манна даҕатан эттэххэ, кыайыылаах хамаанда 300 тыһыынча, үрүҥ көмүс мэтээли ылбыт мэҥэлэр 200 тыһыынча, үһүс буолбут чурапчылар 100 тыһыынча солкуобайынан биһирэннилэр.
Роман ПОПОВ, “Саха сирэ” хаһыат, edersaas.ru
Владислав Коротов хаартыскаҕа түһэриитэ.