Уус Алдан кыргыттарын волейболга хамаандата полуфиналга Нам кыргыттарын кытта көрүстүлэр. Эппиэтинэстээх оонньууга кэлбит олохтоохтор сааланы тобус толорулар. Сорохтор таһырдьа ардах анныгар олорон оонньуу хаамыытын кэтээтилэр.
Кырдьык, көрөөччүнү чуҥкуппат күрэс буолан ааста. Маҥнайгы, иккис түһүмэххэ уус алданнар эрэллээхтик кыайбыттара, оттон үһүскэ Нам кыргыттара хайаан даҕаны ылардыы кииристилэр. Баһыйар очукуо хамаандаттан хамаандаҕа оонньуу былаһын тухары көһө сырытта, түмүк диэки тэҥнэһэн 23:23 буолбута. Онтон дойду кыргыттара икки очукуону утуу-субуу ылан, 25:23 ахсааннаах кыайдылар. Уопсай ахсаан 3:0 — Уус Алдан финалга тахсар.
Хамаанда капитана Мичийэ Калининская оонньуу туһунан:
— Олус күүстээх кыргыттар, киһини илиһиннэрэр оонньуу ааста. Намнар маладьыастар. Аны кыһыл көмүс туһугар Дьокуускай хамаандатын кытта киирсиэхпит. Уопсайынан VIII-с Оонньуулар үрдүк таһымҥа ааһан эрэллэр, хамааандалар күүстээхтэр, тэрээһин үчүгэй.