Бүгүн Мындаабаҕа Дьокуускай хамаандата Уус Алдан кыргыттарын кытта волейболга кыһыл көмүс мэтээли былдьаһар улахан оонньуулара түмүктэннэ.
Маҥнайгы түһүмэххэ олохтоох кыргыттар бэрт эрэллээхтик кыайдылар. Ол эрээри, иккис түһүмэҕи ылан, дьокуускайдар кыайыыны чэпчэкитик биэрэр санаалара суоҕун көрдөрдүлэр. Үһүс түһүмэх эмиэ куорат кыргыттарыгар очукуо аҕалла. Төрдүс түһүмэх тэҥ соҕус кыахтаахтык барда. Ол эрээри, түмүгэр дойдулаахтар инники таҕыстылар, ахсаан 19:25 Уус Алдан хамаандатын туһатыгар!
Саала иһэ сарсыарда эрдэттэн туолан, көрөөччүлэр үксүлэрэ тиэргэҥҥэ баар улахан экранынан көрөн олорон «ыалдьааччы» буоллулар.
15 очукуоҕа диэри оонньонор бэһис түһүмэххэ хамаандалар тэбис тэҥ оонньууну көрдөрдүлэр. Бастыыр очукуо хамаандаттан хамаандаҕа көһө сырытта. Тиһэх буолуохтаах 15 очукуону дьокуускайдар ылбыттара эрээри, уус алданнар 14 очукуолаах буоланнар, оонньуу салҕаммыта, икки очукуонан куоһарыыны ситиһии саҕаланна. Ыалдьааччылар тохтообот хаһыылара доҕуһуоллаах Уус Алдан кыргыттара 18:16 ахсааннаах бэһис түһүмэҕи ылан, дьокуускайдартан кыайыыны туура туттуллар!
Уус Алдан кыргыттарын хамаандатын тириэньэрэ Максим Николаевич Аммосов хамаандатын быйылгы таһымын астынар:
— Оонньуулар тухары бары күөн көрсүһээччилэрбитин 3:0 кыайан кэллибит. Арай, маҥнайгы оонньуубутугар Мэҥэ Хаҥалас хамаандатыгар бастакы түһүмэҕи биэрэн туран 3:1 кыайбыппыт. Куорат кыргыттарын кытта былырыын көрсөн 3:2 кыайан турардаахпыт. Биллэн турар, олус күүстээх хамаанда. Ол эрээри, дойдубутугар хайдах даҕаны кыаттарар сатаммат этэ. Ыалдьыбыт, өйөөбүт бар дьоммутугар барҕа махтал!
Мария Васильева, Егор Карпов хаартыскалара