Уус Алдан Курбуһаҕар уонна Бэрт Ууһугар үөрэх эбийиэктэрин бастакы сыбаайалара түстүлэр

Бүгүн, муус устар 17 күнүгэр, Уус Алдан улууһун Курбуһах нэһилиэгэр уһуйаан уонна Бэрт Ууһун нэһилиэгэр оскуола бастакы сыбаайалара түспүт үөрүүлээх бэлиэ күннэрэ буолла. Бу тэрээһиннэргэ Саха Өрөспүүбүлүкэтин Үөрэҕин миниистирэ Михаил Сивцев, Тыа хаһаайыстыбатын министиэристибэтин тутууга дириэксийэтин салайааччыта Кирилл Местников, улуус баһылыга Алексей Федотов, бэдэрээтчиттэр, улуустааҕы үөрэх управлениетын салалтата кытыннылар. Бу туһунан улуус пресс-сулууспата иһитиннэрэр.

Курбуһах нэһилиэгин Уус Күөлэ сэлиэнньэтигэр «Чуораанчык» уһуйаан бастакы сыбаайата түстэ. Онон олохтоохторго быйыл нэһилиэккэ Оҕо саас сыла биллэриллибитинэн биир улахан бэлиэ күн ааһан эрэр. 50 миэстэлээх уһуйаан «Тыа сирин тирэхтээхтик сайыннарыы» бырагырааманан тутуллуоҕа. Бүгүҥҥү күҥҥэ 45 оҕолоох уһуйаан Курбуһахтааҕы оскуолаҕа баазаланан, үлэлии-хамсыы турар.

Уһуйаан сэбиэдиссэйэ Елена Наумова кэпсииринэн, бу иннинээҕи уһуйаан 1975 сыллаахха арыллан, бастакы сэбиэдиссэйинэн Роза Петровна Аммосова үлэлээбит. Билигин иитээччилэр оҕолору «Муусука барыбытыгар», «Талааннаах оҕо», «Саахымат — оҕолорго» бырайыактарга көхтөөхтүк кытыннараллар. Онон иитиллээчилэр улуустааҕы, өрөспүүбүлүкэтээҕи күрэхтэһиилэргэ ситиһиилээхтик кытталлар.

Итиэннэ бүгүн Бэрт Ууһун нэһилиэгин Сыырдаах сэлиэнньэтигэр оскуола сыбаайата түстэ. Уоһук Портнягин аатынан оскуолаҕа күн бүгүн 128 оҕо үөрэнэр. Саҥа оскуола 2022 сылга үлэҕэ киирэрэ былааннанар.

Хаартыскалар — пресс-сулууспаттан.