Улуус кыстыгы көрсө 35,5 туоннаны оттуохтаах. Билигин хаһаайыстыбалар күөх быйаҥ күрэҕэр күүстээхтик турунан үлэлии-хамсыы сылдьаллар.
Уопсай ылан көрдөххө, үүнүү орто. Үрэх, өрүс сүнньүгэр сытар нэһилиэктэргэ от куһаҕана суох, оттон алаас сирдээх Сыырдаах, Курбуһах, Бэйдиҥэ курааннаабыттар. Онон хаһаайыстыбалар бэйэлэрин сирдэрин бүтэрдэхтэринэ, үрэх эргин сытар нэһилиэктэргэ баран оттууллара быһаарыллыбыт.
Улуус кылаабынай агронома Прокопий Белолюбскай бэлиэтииринэн, бурдук үүнүүтэ ааспыт сыллааҕар мөлтөх буолсу. «Биэттэ Агро» (Баатаҕай), «Илларионов» бааһынай хаһаайыстыба (Дүпсүн) былырыын биир гектартан 13-14 ц хомуйбут буоллахтарына, быйыл 8-9 ц эрэ буолсу. Даҕатан эттэххэ, Уус Алдан улууһа Тыа хаһаайыстыбатын научнай—чинчийэр институтун кытары бииргэ үлэлээн, Саха сирин усулуобуйатыгар анаммыт сэлиэһинэй, ньэчимиэн суордугар үлэлиир. Ааспыт сылларга үүнүү үчүгэй буолан, атын улуустары элита кылаастаах сиэмэнэн хааччыйбыта.
Дүпсүн олохтооҕо Дмитрий Илларионов сылтан сыл бааһынатын кэҥэтэн, быйыл бурдугу 500 гектарга ыспыт. Кэлэр өттүгэр сирин 1000 гектрга тиэрдэр баҕалаах.
Куоракка үлэлии сылдьан, 2014 с. дойдутугар, Кэптэнигэ, тахсан бааһынай хаһаайыстыба тэринэн, дьиэ кэргэн пиэрмэтин тэрийиигэ анаммыт бырагыраама гранын ылан, сүүс ынахха кыстык хотон, сайылык туттубут Анатолий Бурнашев 164 гектарга эбиэһи, 20 гектарга Судан отун ыспыт.
Кэптэни отчута Иннокентий Бурнашев ходуһата кыстыыр отун хааччыйбатаҕына, күһүн күөл хомуһун ходуйан эбинэр санаалаах.
Дьэ, бу курдук тыа сирин үлэһит дьоно от суох диэн олорон хаалар санаалара суох, онон улуус кыстыыр отун хааччынарга бары күүһүн түмэр.
Раиса СИБИРЯКОВА, “Саха сирэ” хаһыат, edersaas.ru