Уус Алдан футболистара Англияҕа барар иһин күрэхтэһиэхтэрэ

Бөлөххө киир:

Оҕо дьиэтин уонна интэринээт-оскуола иитиллээччилэрин ортолоругар футболга күрэхтэһии бастакы түһүмэҕэ бу күннэргэ «Дохсун» спорт киинигэр ыытылынна. 11 хамаандаттан барыларыттан ордук үчүгэй оонньууну Уус Алдан улууһун Орто Эбэ анал коррекционнай оскуолатын иитиллээччилэрэ көрдөрөн, салгыы Владивостокка баран күрэхтэһиэхтэрэ.

Анивера Акимова, «Саха сирэ» хаһыат, https://edersaas.ru/

«Будущее зависит от тебя» диэн Россиятааҕы бырайыак чэрчитинэн ыытыллар күрэхтэһии сыл ахсын уонтан тахса хамаанданы түмэр. Бу сырыыга өрөспүүбүлүкэ алта үөрэх кыһатыттан 11 хамаанда кытынна. Эдэр футболистар бастыыр иһин икки күнү быһа кииристилэр. Ордук эрчиллиилээхтэрин Уус Алдан оҕолоро көрдөрдүлэр. Онон инники күөҥҥэ кинилэр таҕыстылар.

Оонньуу түмүгүнэн, «Лучший голкипер» – Дима Николаев уонна Петя Копырин (Уус Алдан), «Лучший нападающий» – Вадим Вишневскай (Дьокуускай) уонна Алина Охлопкова (Мэҥэ Хаҥалас), «Лучший нападающий» – Сандал Шапошников (Уус Алдан) уонна Виктор Болтунов (Дьокуускай), «Лучший бомбардир» – Георгий Максимов (Алдан) уонна Айтал Герасимов (Уус Алдан), «Лучший игрок» Давид Попов уонна Алик Хаджимуратов (Уус Алдан) буоллулар.

«Будущее зависит от тебя» бырайыагы «Мегафон» хампаанньа үлэлэппитэ хаһыс да сылыгар барда. Ол курдук, 2013 сылтан саҕалаан өрөспүүбүлүкэ интэринээт-оскуолаларын 80-тан тахса иитиллээччилэрэ Россия куораттарыгар баран күрэхтэһэн, сынньанан кэллилэр. «Сыллата Саха сирин сүүһүнэн оҕото спордунан дьарыктанан, бэйэ-бэйэлэрин кытары билсэн, бииргэ түмсэн бириэмэлэрин туһалаахтык атаараллар», – диэн «Мегафон» ПАУо Саха сиринээҕи салаатын салайааччы Александр Костерин этэр.

Анивера Акимова, «Саха сирэ» хаһыат, https://edersaas.ru/

+1
0
+1
0
+1
0
+1
0
+1
0
+1
0
+1
0