Уус Алдан улууһугар өссө биир оскуола иннинээҕи үөрэх тэрилтэтэ эбилиннэ. Киэҥ-куоҥ, сырдык, толору хааччыллыылаах уһуйааҥҥа 50 кырачаан олохтоох сылдьыаҕа.
Уһуйаан “Сахам сирэ XXI үйэҕэ” өрөспүүбүлүкэтээҕи үтүө дьыала хамсааһын бырагырааматын иитинэн тутулунна. Саҥа оҕо саада табыгастаах уонна куттала суох буолуу өттүнэн аныгы ирдэбилгэ барытыгар эппиэттиир. Тутуу уопсай иэнэ — 731,77 кв. миэтэрэ. Манна үс бөлөх (кыра, орто улахан) үлэлиэҕэ.
Хас биирдии бөлөххө утуйар-оонньуу, сыгынньахтанар уонна тахсан киирэр туспа блоктардаах. Тэлгэһэҕэ 2 веранда, 3 оҕо былаһаакката, ону тэҥэ, “Чэбдик” спорт комплекс уонна “Куйаар” сайыннарар былаһаакка бааллар.
Уһуйаан үлэһиттэрэ уһаайба иһинээҕи учаастакка экологическай өттүнэн ыраас оҕуруот аһылыгын – хортуоппуйу, моркуобу, оҕурсуну уонна помидору олордор былааннаахтар. Отонноох үүннээйилэри номнуо олордубуттар, баранньыктары туруорбуттар. Уһуйаан салалтата тэлгэһэ иһигэр эһиил “Алгыс” национальнай уонна “Ыллыкчаан” экологическай кииннэри тутар толкуйдаах.
“Сардаана” уһуйаан тутуутугар өрөспүүбүлүкэ бүддьүөтүттэн 13,9 мөлүйүөн, улуус уонна нэһилиэк бүддьүөтүттэн 22,2 мөлүйүөн солкуобай үп көрүллүбүт. Итини таһынан, урбаанньыттар З.З. Стрекаловскай уонна В.К. Сивцев уһуйаан тутуутугар анаан 2,2 мөлүйүөн солкуобайы биэрбиттэр. Тутуу барыытыгар олохтоохтор эмиэ көхтөөхтүк кыттыбыттара, иллэҥ бириэмэлэригэр субуотунньуктаабыттара диэн СӨ Тутууга министиэристибэтин пресс-сулууспата иһитиннэрэр.
edersaas.ru