Уус Алдан оройуонугар национальнай бырайыактарынан дьиэ-уот, социальнай эбийиэктэр тутуллаллар, суолу өрөмүөннүүллэр. Саха сирин Норуоттарын оонньууларыгар бэлэмнэнии тэтимнээхтик ыытыллар.
edersaas.ru
Атырдьах ыйын 4 күнүгэр өрөспүүбүлүкэ баһылыга Айсен Николаевка улуус баһылыга Алексей Федотов оройуоҥҥа үлэ хайдах ыытылларын билиһиннэрдэ.
Ил Дархан хамсык балаһыанньатын уонна ойуур баһаардарын туһунан туоһуласта. Коронавирус дьаҥа улууска аан бастаан бэс ыйын ортотугар бэлиэтэммитэ. Ити кэмтэн ыла 32 киһи ыарыйда, кинилэртэн 30 киһи үтүөрдэ. Хантаахтаах 39 киһи дьиэттэн тахсыбакка олоруу эрэсиимин тутуһар.
Оройуон баһылыга бэлиэтээбитинэн, бу кэмҥэ диэри 36 ойуур уота бэлиэтэммит. Билигин Бээрийэттэн 18 км сиргэ уоту умулларыыга туруннулар. “Нэһилиэк өттүттэн балаһаны тиэрдилэр. Ону тэҥэ оттоох үрэхтэр бааллар. Баһаары умулларыыга бары күүһү бырахтыбыт. 230 киһи уонна уонча тиэхиньикэ үлэлиир. Бары атын баһаардары умулларбыппыт, ити, биллэн турар, өрөспүүбүлүкэ суһал штабын көмөтүнэн”, — диэн Федотов иһитиннэрдэ.
Алексей Васильевич сүөһү аһылыгын хампаанньатын туһунан эмиэ кэпсээтэ. Кураан буолан, кыстыкка бэлэмнэнии эмиэ уустуктардаах. Кураантан уонна аһыҥаттан сылтаан 25 тыһыынча туонна оту эрэ бэлэмниир кыах баар. Тиийбэт оту өрөспүүбүлүкэ атын хаһаайыстыбаларыттан атыылаһыахтара. Маны тэҥэ сиилэс, сенаж бэлэмнэнэр.
Тыа хаһаайыстыбатын туһунан кэпсииригэр оройуон баһылыга уус алданнар граны ылыыга өрөспүүбүлүкэ куонкурустарыгар кытталларын аҕынна. 2014 сылтан кинилэр 102 граны ылбыттар. Ити көмөтүнэн кэнники үс сылга сүөһү ахсаанны элбэппиттэр. Быйыл ыанар ынах ахсаана 801 төбөнөн эбиллибит.
Көрсүһүү сүрүн тиэмэтинэн Саха сирин Норуоттарын ахсыс спортивнай оонньууларыгар бэлэмнэнии буолла. Оонньуулар 2022 сылга САССР 100 сылыгар Уус Алдаҥҥа ыытыллыахтаахтар. Бороҕоҥҥо кэккэ социальнай уонна инфраструктурнай эбийиэктэр тутуллаллар, ол иһигэр 75 миэстэлээх оҕо саада, култуура дьиэтэ, Суоттуга — 220 миэстэлээх оскуола. Оройуон киинигэр маны сэргэ сүүрэр суоллаах, тиирдээх, спортивнай саалалаах, стадионнаах элбэх өҥөнү оҥорор спортивнай комплекс, тустуу саалата элбэх тутуллуохтара. Улуус баһылыга Бороҕоҥҥо 450 миэстэлээх оскуоланы тутарга этии киллэрдэ.
Өрүттэр национальнай бырайыактары олоххо киллэриини дьүүллэстилэр. Чуолаан, кэпсэтии “Куттала суох уонна хаачыстыбалаах суоллар” нацбырайыак тула барда. Бу чэрчитинэн Бороҕоҥҥо бу күннэргэ Лонгинов уулуссатын бетоннууллар. Маны сэргэ Бороҕон-Төҥүлү уонна Суотту-Бороҕон суол учаастактара өрөмүөннэнэллэр.
Саахалланар уонна хаарбах дьиэттэн көһөрүүгэ үлэ ыытыллар, манна 11 нэһилиэк кыттар. 2025 сылга диэри улууска 86 элбэх кыбартыыралаах дьиэттэн олохтоохтору көһөрүөхтээхтэр. Итинтэн 56 – оройуон киинигэр.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни СТРЮКОВА