Быйыл Арассыыйа үрдүнэн Экология сылынан биллэриллибитэ. Манан сибээстээн, биһиги өрөспүүбүлүкэбитигэр араас таһымнаах тэрээһиннэр бөҕө ыытылыннылар. Уус Алдан улуһуун Айылҕа харыстабылын иниспиэксийэтин салайааччыта Семен Васильев үлэтин-хамнаһын туһунан кэпсэттибит. edersaas.ru
Уус Алданнааҕы инспекция өрөспүүбүлүкэҕэ Айылҕа харыстабылын министиэристибэтэ тэриллиэҕиттэн үлэлиир. Онон, уопсай салалта министиэристибэттэн буолар. Билиҥҥитэ Уус Алдан иниспиэксийэтигэр судаарыстыбаннай сулууспалаах түөрт үлэһит баар.
“Биһиги сүрүннээн судаарыстыбаннай боломуочуйалары толоробут. Ол курдук, айылҕа харыстабылыгар үлэлиир тэрилтэ буоламмыт ууну, салгыны киртитиини, оҥорон таһаарар тэрилтэлэр үлэлэрин хонтуруоллуубут. Саҥа тэриллибит, саҥа салайааччылаах тэрилтэлэр айылҕа харыстабылыгар сокуону билбэттэрин ааһан, сокуону кэһэллэрэ баар суол. Сайыҥҥы өттүгэр биирдиилээн дьон пляж арынаары анал ирдэбиллэри ыйыталаһааччылар. Онуоха утары олохтоохтортон суруктар, үҥсүүлэр киирэллэр. Онон олохтоорго, тэрилтэлээхтэргэ, оскуола оҕолоругар анаан кэмиттэн кэмигэр семинардары, лекциялары ыытабыт. Эдэр натуралистар станцияларын кытта ыкса үлэлэһэбит”, — диэн Уус Алдан улуһуун Айылҕа харыстабылын иниспиэксийэтин салайааччыта Семен Васильев кэпсиир.
Билиҥҥи туругунан, үгүс улууска биир сүрүн кыһалҕанан сыбаалканы дьаһайыы буолар. Маны былааннаан көрөр-истэр, харайар тэрилтэ суох. 2015 сылга диэри олохтоох бэйэни салайыныы сыбаалканы көрөр-истэр диэн федеральнай сокуон баара. Онтон ол уларыйан, анал тэрилтэ дьаһалыгар киириэхтээх диэн буолбута, барытын хонтуруоллуур регионнааҕы оператор баар буолуохтаах. Уус Алдаҥҥа бу кыһалҕаны нэһилиэк баһылыктара быһаараллар эбит. Ол эрээри, эппиэтинэс баһылыкка буолбатах буолан, сыбаалка дьаһаллыбакка хаалар түгэннэрэ даҕаны ханна барыай. Иниспиэксийэ, былаанынан көрөн, бэрибиэркэ ыытаар.
Бу курдук, Уус Алданнааҕы Айылҕа харыстабылын иниспиэксийэтин үлэтин кытта “Улуус олоҕо” бырайыакпыт чэрчитинэн билистибит.
Айтана Аммосова, «Саха сирэ» хаһыат, edersaas.ru