Быйылгы сылга Уус Алдан улууһугар үүт соҕотуопкатыгар 3 900 туонна былаан турар. Ол иһигэр, «Мүрү-Ас» ТХПК – 2300 туонна, «Дүпсүн» ТХПК – 800 туонна уонна «Туйма» ТХПК – 800 туонна былааннаахтар.
edersaas.ru
Балаҕан ыйын 2 күнүн туругунан, 2846 туонна үүт соҕотуопкаламмыт. Бу сыллааҕы былаан 73 %-на туолла. Былырыыҥҥы көрдөрүүгэ тэҥнээтэххэ, 57 туонна элбэх үүтү тутан иһэллэр. «Мүрү-Ас» ТХПК – 1704 туоннаны, «Дүпсүн» ТХПК – 713 туоннаны, «Туйма» ТХПК – 429 туоннаны туттулар. Билигин нэдиэлэҕэ 133 туонна үүт тутуллан астанар.
Быйыл улууска от былаана — 29 295 туонна. Атырдьах ыйын 4 күнүнээҕи тыа хаһаайыстыбатын исписэлиистэрин сабаҕалааһыннарынан, 26 100 туонна от бэлэмнэниэхтээх. Балаҕан ыйын 3 күнүнээҕи көрдөрүүнэн, Уус Алдан улууһун үрдүнэн уопсайа 26 267,3 туонна (89 %) от бэлэмнэннэ, ол иһигэр 1623 туонна — тэрээһиннээх хаһаайыстыбалар, 9679 туонна — бааһынай хаһаайыстыбалар уонна 14965,3 туонна — кэтэх хаһаайыстыбалар. Былырыын баччаларга улууска 23 882,1 туонна от бэлэмнэммитэ.
Мобильнай биригээдэлэр уопсайа 1750 туонна оту бэлэмнээбиттэр, былаан быһыытынан 2050 туонна оту бэлэмниэхтээхтэр. Улууска уопсайа 21 мобильнай биригээдэ тэриллэн, улуус иһигэр ыраах сытар ходуһаларга тахсан оттуу сылдьаллар.
Быйылгы сыл төһө да кураан буоллар, бурдук үүнүүтэ орто. Ортотунан 13 сэнтиниэри хомуйан, 1400 туонна сиэмэни хомуйарга былаанныыллар. Үүнүү ааспыт сылтан ордук.
Бу хаһаайыстыбалар сааскы өттүгэр хаар типтэриитин, сиик саптарыытын кэмигэр оҥороллорун, паары, күһүҥҥү хорутуу үлэтин уонна уоҕурдууну атыылаһан киллэриилэрин түмүгэ буолар.
Улуус үрдүнэн 202 гектар хортуоппуй ыһыллыбыт. Мантан 85 гектар — тэрээһиннээх хаһаайыстыбалар. Сүрүннээн Суотту, Бороҕон нэһилиэгин бааһынай хаһаайыстыбалара нүөлсүтүүгэ өрүс уутун туһанар буолан дьарыктаналлар. Күһүҥҥү хомуурга, сабаҕалааһын түмүгүнэн, 1800 туонна хортуоска хомуллуо.
Оҕуруот аһа 36,5 гектар ыһыллыбыт. Бу иһигэр 22,1 гектар — хаппыыста, 4,5 гектар — моркуоп, 3,7 гектар — сүбүөкүлэ, 6,2 гектар — атын араас култуура.
Виктория Бястинова, «Саха сирэ» хаһыат, edersaas.ru
Хаартыска: Баһылай Мүрү.