Коронавирус дьаҥын бохсор үлэҕэ, волонтердар көмөлөрө төһүү буолар.
Өрөспүүбүлүкэ бары улуустарыгар дьиэҕэ хааччахтанан олорор аҕам саастаахтарга, соҕотох олорор кырдьаҕастарга, инбэлииттэргэ сайаапканан көмөнү оҥоруу хайдах салҕанан иһэрэ оройуоннааҕы анал ыстаапка отчуоттанар.
Уус Адаҥҥа ыччат бэлиитикэтин, дьиэ кэргэн уонна успуорт отделын сүрүннүүр исписэлиис, волонтердар улуустааҕы ыстааптарын сүрүннүүр Наталья Охлопкова иһитиннэрэринэн, 21 нэһилиэккэ ортотунан уончалыы волонтер үлэлии сылдьар. Барыларын холбоон — 164-тэр.
Икки ый кэриҥэ кэмҥэ улуус үрдүнэн уопсайа 1249 сайаапка киирбит. Муус устарга 1076 киһиэхэ көмөлөспүттэр. Ыам ыйын 1 күнүгэр, барыта 44 ыалга ас-үөл, эмп-томп тиэрдиллибит. Оттон бу кэнники биэс күн иһигэр волонтердар көмөлөрүнэн 167 киһи туһаммыт.
Итинтэн көстөрүнэн, хааччахтанан олорууну ааспыт ыйга дьон-сэргэ төһө кыалларынан балачча тутуспут.
Итиэннэ, киһи аһын-үөлүн, эмин-томун, күннээҕи туттар тэрилин баччаҕа диэри бэйэтэ ылынан, хааччынан олорбут буоллаҕына, коронавирус ыкпыт кыһалҕатыттан, волонтер көмөтүнэн туһаныыга кэлин үөрэннэҕэ. Ону ханна да сайаапкалар киириилэрин ахсаана мэктиэлиир.
Сардаана Баснаева, «Саха сирэ» хаһыат, edersaas.ru
Хаартыскалар улуустааҕы волонтердар ыстааптарыттан