Уус Алдаҥҥа энергетиктэр уот ситимин оҥороллор.
Дмитрий Садовников эбийиэктэргэ сылдьан баран далааһыннаах тэрээһини тэрийэр кэмитиэт чилиэннэрин, олохтоох дьаһалта салалтатын кытта көрсүбүт.
Күүстээх силлиэлээх тыалтан уот уон лииньийэтэ, — алта 0,4 кВ уонна 4 — 10 кВ кыамталаах уот лииньийэлэрэ быстыбыттара. Ол түмүгэр Бороҕон, Чараҥ, Майаҕас, Мындааба уота суох хаалбыттара. Билиҥҥи туругунан 10 кВ кыамталаах уот лииньийэлэрэ чөлүгэр түһэриллибиттэр. Маны таһынан, Бороҕоҥҥо биир хочуолунай кырыыһата тыалтан сууллубут. Чугастааҕы кэмҥэ оттук сезона саҕаланыар диэри улуус бэлэм буоларын курдук кырыыһаны уонна хочуолунай тэрилин уларытыыга боппуруос быһаарыллар.
Бэҕэһээ киэһээҥҥэ диэри оройуон киин балыыһатыгар мэдиссиинэ көмөтүгэр наадыйан эмсэҕэлээбит 23 киһи көрдөрбүт, ол иһигэр сокуоннай саастарын ситэ илик түөрт оҕо. Биэс киһи балыыһаҕа киирбит. Икки киһини санитарнай рейсинэн Дьокуускайга 2 нүөмэрдээх өрөспүүбүлүкэтээҕи балыыһаҕа киллэрэргэ быһаарбыттар. Үс киһи Бороҕон балыыһатыгар мэдиссиинэ үлэһиттэрин кэтээн көрүүлэригэр хаалар.
Стадиоҥҥа катастрофа мэдиссиинэтэ үлэтин салгыыр. Онно икки стационарнай мэдиссиинэ пууна баар. Суһал көмө түөрт көлөтө дьуһуурунайдыыр.