Уус Алдаҥҥа түөрт нэһилиэк куоластааһыҥҥа ордук көхтөөхтүк кыттан иһэр

РФ Төрүт Сокуонугар уларытыылары киллэрэргэ куоластааһын бэс ыйын 25 күнүттэн саҕаламмыта. Коронавирус дьаҥын бохсон, ханна даҕаны, анал кыраапыктар оҥоһуллубуттар, дьон-сэргэ биир сиргэ тоҕуоруспатын курдук усулуобуйалар тэриллибиттэр.

Уус Алдантан улуустааҕы куоластыыр хамыыһыйа (ТИК) бэрэссэдээтэлэ Александра Егоровна Аянитова иһитиннэрбитинэн, улууска уопсайа 36 учаастак тэриллибит. Хамыыһыйаҕа 218 киһи үлэлиир, куоластааһын хаамыытын кэтээн көрөөччүлэр улуус үрдүнэн 80-тан тахсалар. Олохтоох хаһыат, тэлэбиидэнньэ куоластааһын хаамыытын күннэтэ сырдаталлар.

—-Улуус үрдүнэн испииһэккэ барыта 14 414 киһи бэлиэтэнэр. Атын сиргэ бырапыыскалаах гынан баран, манна сайабылыанньаламмыттары холбоон, барыта 14 890 киһи. Куоластааһыҥҥа 83 ыччат аан бастаан кыттар. 

Үс күн устатыгар 5681 киһи куоластаата. Ити улуус үрдүнэн 39 бырыһыан курдук буолар. Бүгүҥҥү түмүк киэһээ биллиэҕэ. Балаҕаннаах, Бээрийэ, Өспөх уонна Остуойка олохтоохторо көхтөөхтүк кытталлар. Ол түмүгэр, ити нэһилиэктэр хас биирдиилэрэ 80%-ҥа чугаһаттылар. Оттон оройуон киинигэр, уопсайынан коронавирус дьаҥа баара бэлиэтэммит сирдэригэр, 25-30 % курдук буолла. Тиэргэҥҥэ куоластыыр баҕалаахтарын биллэрэн 3028 киһи сайаапкаламмыта. Итинтэн 1500-кэ чугаһыыр киһи дьиэтин таһыгар куоластаата.

Дьаҥы-дьаһаҕы бохсор туһуттан, Роспотребнадзор бары ирдэбиллэрэ кытаанахтык тутуһуллаллар. Харыстанар сириэстибэлэринэн, мааскаларынан, бэрчээккилэринэн хааччыллан олоробут. Куоластыы кэлбит дьон икки ардыларыгар тэйиччи сылдьыы булгуччу тутуһуллар, анал бэлиэлэр бааллар. Дьон тоҕуоруспатын курдук, киирэр-тахсар ааннар тус-туһунаннар, — диэтэ.