Уус Алдаҥҥа Саха сирин норуоттарын VIII спортивнай оонньууларын тэрийэн ыытыыга бэлэмнэнии үлэлэр тустарынан
СӨ Ил Дархана Айсен Николаев Уус Алдан улууһугар Саха сирин норуоттарын VIII спортивнай оонньууларыгар бэлэмнэнии үлэтин бэрэбиэркэлээтэ.
Уус Алдаҥҥа быйыл от ыйыгар бу улахан тэрээһин ыытыллар. Успуорт 16 көрүҥэр күрэхтэһиилэр Бороҕоҥҥо, Мындаабаҕа, Сыырдаахха уонна Чараҥҥа буолуохтара.
Далааһыннаах тэрээһиҥҥэ бэлэмнэнии үлэлэр хайдах ыытыллан иһэллэрин Ил Дархан Айсен Николаев көрдө-иһиттэ.
«Өрөспүүбүлүкэ дьоһун суолталаах спортивнай тэрээһинигэр бэлэмнэниигэ кыһалҕаны кэмигэр туоратарга, боппуруоһу быһаарарга тэрийэр кэмитиэт көһө сылдьар мунньаҕын ыытыахпыт. Туох баар бары боппуруостарга, эбийиэктэри тутууттан саҕалаан, уулуссалар ситимнэрин өрөмүөнүгэр, култуурунай бырагыраамаҕа, бу тэрээһин ыалдьыттарын, кыттыылаахтарын олорор сирдэринэн тарҕатыыга тиийэ барытыгар эппиэтинэстээх тэрилтэлэр улахан болҕомтолорун уураллара ирдэнэр. Спортивнай оонньуулар дьоһуннук, үрдүк таһымнаахтык тэриллэн ыытыллыахтаахтар«, — диир Айсен Николаев.
Уус Алдаҥҥа успуорт түөрт эбийиэгэ тутуллар: Бороҕоҥҥо сүүрэр дорожкалаах, 1000 миэстэлээх стадион, Чараҥҥа 1124 миэстэлээх тырыбыналаах ипподром, Мындаабаҕа 32 миэстэлээх уопсайдаах дэгиттэр спортивнай комплекс. Ону сэргэ, сыл бүтүөр диэри Бороҕоҥҥо доруобуйаны чэбдигирдэр спортивнай элбэх хайысхалаах комплекс тутуллан киирэрэ былааннанар.
«Балар сэлиэнньэ спортивнай олоҕун киининэн буолуохтаахтар. Онон тутуу хаачыстыбата кытаанахтык хонтуруолланыахтаах«, — диэн Ил Дархан тоһоҕолоон эттэ.
Бороҕоҥҥо үс сүрүн уулусса өрөмүөннэниэхтээх. Юннаттар уонна Ленин уулуссалара аспаалланаллар, Стрекаловскай уулуссата бетоннанар.
«Бороҕоҥҥо Саха сирин норуоттарын VIII спортивнай оонньууларын ыытарга быһаарыыны ылынан бараммыт, олохтоохторго Ленин уонна Юннаттар уулуссалара аспаалланыахтара диэн эрэннэрбиппит. Бу соругу хайаан да толоруохтаахпыт«, — диэтэ Айсен Николаев итиэннэ СӨ Тырааныспар уонна суол хаһаайыстыбатын министиэристибэтигэр сөптөөх сорудаҕы биэрдэ.
Уус Алдан улууһун баһылыга Алексей Федотов спортивнай оонньуулар ыалдьыттарын уонна кыттыылаахтарын тарҕатан олохтуурга Бороҕоҥҥо, Мындаабаҕа, Чараҥҥа, Майаҕаска уонна Сыырдаахха үөрэх 22 эбийиэгэ бэлэмнэниллэрин эттэ. Ону таһынан, оройуону тупсаран оҥорууга былаан бигэргэтиллибит. Олохтоохтор субуотунньуктарга көхтөөхтүк кытталлар, юннаттар ыстаансыйалара уулуссалары, искибиэрдэри, Бороҕон болуоссаттарын сибэккилэринэн симииргэ анаан арассаадалары олордубуттар.
СӨ Физкултуура уонна успуорт министиэристибэтэ кулун тутартан бэс ыйыгар диэри сүүмэрдиир күрэхтэһиилэри тэрийэн ыытары былааннаабыт. Маныаха спортсменнарга, тириэньэрдэргэ, судьуйа састаабыгар быһыыны туруорууга улахан болҕомто ууруллар.
Санатар буоллахха, Саха сирин норуоттарын VIII спортивнай оонньуулара Уус Алдаҥҥа от ыйын 4-9 күннэригэр буолар. Күрэхтэһии түһүлгэтигэр 2000-тан тахса спортсмен кыттара күүтүллэр. Бырагыраамаҕа успуорт 16 көрүҥэ киллэриллибит: баскетбол, волейбол, мини-футбол, чэпчэки атлетика, остуол тенниһэ, дуобат, шахмат, ох саанан ытыы, сыал ытыыта, гиирэ, бокса, спортинг, уо.д.а.
Хаартыскаларга Мария Васильева (СИА) түһэриилэрэ
+1
+1
+1
+1
+1
+1
+1