Уус Алдаҥҥа Саха сирин норуоттарын спортивнай оонньууларын көрсө социальнай суолталаах эбийиэктэр тутуллаллар
Саха АССР 100 сылыгар ананан ыытыллар Саха сирин норуоттарын VIII спортивнай оонньууларын көрсө Уус Алдан улууһугар кэккэ социальнай суолталаах эбийиэктэр тутуллаллар. Мантан сороҕо хайыы үйэ үлэҕэ киирбиттэрэ.
Оонньуулар сүрүн эбийиэктэринэн Мүрү нэһилиэгэр элбэх функциялаах чэбдигирдэр-спортивнай комплекс, единоборство саалата уонна стадион буолуохтара. Тэрээһин от ыйын 4-9 күннэригэр ыытыллыахтара.
Уус Алдан улууһун баһылыга Алексей Федотов билиҥҥитэ үс спортивнай эбийиэк тутуута барарын иһитиннэрдэ. Баһылык этэринэн, Бороҕоҥҥо тутулла турар курдук эбийиэктэр өрөспүүбүлүкэҕэ суохтар. Бу иһигэр Николай Тарскай аатынан элбэх функциялаах чэбдигирдэр-спортивнай комплекс баар. Саҥа тутуу 8 тыһыынча квадратнай миэтэрэ иэннээх, сүүрэр суоллаах, оонньуур көрүҥнэргэ анаан былаһааккалаах, фитнес, аэробика саалалаах, ону тэҥэ тиир баар буолуоҕа.
Мындааба сэлиэнньэтигэр интэринээттээх саала тутуллар. Оттон оонньуулар сүрүн күрэхтэһиилэрэ бу күннэргэ көхтөөхтүк тутулла турар стадиоҥҥа ыытыллыахтара.
Оройуон баһылыга оонньуулар ыытыллар буолан, тутуу эйгэтигэр мультипликативнай көдьүүһү таһаарбытын туһунан бэлиэтиир. Ол курдук, сотору кэминэн Бороҕоҥҥо 75 миэстэлээх оҕо саада, Василий Никифоров-Күлүмнүүр аатынан култуура дыбарыаһа, 450 оҕоҕо анаммыт Мүрү орто оскуолата Бороҕон сэлиэнньэтигэр арыллыахтара.
Санатан суруйдахха, соторутааҕыта Суотту сэлиэнньэтигэр 220 миэстэлээх оҕо саада тутуллубута.