Бу күннэргэ ситэриилээх былаас отчуота Уус Алдан улууһун 21 нэһилиэгэр ыытыллар.
edersaas.ru
9 нэһилиэккэ отчуот буолан бүттэ. СӨ Бырабыыталыстыбатын бэрэссэдээтэлин солбуйааччы Алексей Дьячковскай сылдьыбыт нэһилиэктэригэр отчуокка сылдьан бэлиэтээбитинэн, улуус муниципалитетын салалтата уонна нэһилиэктэр баһылыктара сөптөөх хайысханы тутуһан бииргэ үлэлээһиннэрин түмүгэр, улууска кэлиҥҥи сылларга 30-тан тахса саҥа социальнай эбийиэк тутуллан үлэҕэ киирбит. Ол курдук, 2017 сыллаахха Бороҕоҥҥо, Суоттуга, Майаҕаска оҕо саадтара, Дүпсүҥҥэ Василий Никифиров-Күлүмнүүр мусуой-уһаайбатыгар Духуобунас киинэ, Бээрийэҕэ эдэр исписэлиистэргэ аналлаах түөрт кыбартыыралаах олорор дьиэ, Кэптэнигэ саҥа хочуолунай тутуллан, үлэҕэ киирбиттэр.
— Бу маннык социальнай-экономическай сайдыы тэтимнээхтик барар буолан, кэлиҥҥи сылларга ситэриилээх былаас отчуоттарыгар туруорсар боппуруостаргыт ис хоһооно уруккулардааҕар олох атын. Билигин дьон болҕомтотун улууска уонна нэһилиэккэ олох хаачыстыбатын тупсарыыга туһаайар, — диэн Алексей Дьячковскай отчуоттарга тоһоҕолоон бэлиэтиир.
Ситэриилээх былаас отчуота Уус Алдан улууһугар олунньу 8 күнүгэр түмүктэниэҕэ.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа СӨ Ил Дарханын уонна СӨ Бырабыыталыстыбатын пресс-сулууспата түһэриитэ.