Култуура Маны аах

Уус Алдаҥҥа Петр Оготоевка аналлаах тэрээһин ыытылынна

Уус Алдан улууһугар Олоҥхо уонна Хомус декадатын чэрчитинэн сахалартан бастакы идэтийбит хомусчут, Арассыыйа үтүөлээх артыыһа, Аан дойду виртуоз хомусчута Петр Оготоев төрөөбүтэ 60 сылыгар аналлаах тэрээһин буолан ааста.

Бу күҥҥэ улуус дьаһалтата, аан дойду хомуһун музейын киинин салалтата, Петр Оготоев бииргэ төрөөбүт убайа Егор Оготоев, бииргэ үөрэммит, алтыспыт үөлээннээхтэрэ кэлэн кыттыыны ылан, Петр Петрович олорон ааспыт дьоһун олоҕун, айар үлэтин ахтан санаан аастылар.

Тэрээһиҥҥэ хомус аан дойдутааҕы түмсүүтүн генеральнай сэкирэтээрэ Арон Силаги (Венгрия), аан дойду виртуоз хомусчута Лео Татагава (Япония) видео-эҕэрдэлэрэ, ахтыылара улахан болҕомтону тарта. Онно Петр Оготоев айар үлэтин, витруоз хомусчут быһыытынан аан дойду таһымыгар үрдүктүк сыаналыылларын бар дьоно долгуйа иһиттилэр. Ону сэргэ Петр Оготоев суолун тэлэригэр көмөлөспүт учуутала, филологическай наука доктора, профессор И.Е. Алексеев – Хомус Уйбаан:

Петр Петрович айар үлэтин бастакы түһүмэхтэригэр олук уурбут буоламмын, кэлин ситиспит кыайыылара саха хомуһун музыката сайдыытыгар улахан суолталааҕын өрүү бэлиэтиибин. Хомус тардыытын биир өлбөөдүйбэт сулуһа, аан дойду виртуоз хомусчута, идэтийбит артыыс Петр Оготоев аата хомус историятыгар умнуллубат аналлаах, — диэн видео-ахтыытытын түмүктээтэ.

Бу тэрээһиҥҥэ аан дойду хомуһун музейын киинин салалтата кэлэн кыттыыны ылбыта тэрээһин таһымын үрдэттэ.

Дьоро күн Альберт Находкин ааптарскай бырайыагынан XI төгүлүн ыытыллар өрөспүүбүлүкэтээҕи «Хомус кырдала — 2021» кыайыылаахтарын эҕэрдэ нүөмэрдэрэ уонна наҕараадалааһын үөрүүлээх чааһынан түмүктэннэ.

Улуус дьаһалтатын пресс-сулууспата.

0
0
Telegram @edersaas20