Уус Алдаҥҥа оскуола дириэктэрин быһахтаатылар. Холуобунай дьыала тэрилиннэ

Ааптар: 
Бөлөххө киир:

Уус Алдан улууһун киинигэр Бороҕоҥҥо ыам ыйын 25 күнүн түүнүгэр оскуола оҕолоро кыттыылаах ыарахан быһылаан таҕыста.

edersaas.ru

СӨ ИДьМ-тын пресс-сулууспата иһитиннэрбитинэн, ыам ыйын 25-күнүгэр, түүн 01.00 чаас саҕана, Уус Алдан улууһун полициятын дьуһуурунай чааһыгар «суһал көмө» диспетчериттэн иһитиннэрии киирбит. Искэ быһаҕынан анньыллыбыт 33 саастаах киһи киллэриллибитин туһунан.

Барыллаан быһаарыынан, Бороҕон сэлиэнньэтин биир уулуссатыгар ыччаттар уонна эмсэҕэлээччи икки ардыгар иирсээн тахсыбыт.

Онуоха биир уол эр киһини иккитэ быһаҕынан искэ анньыбыт.

Быһылаан буолбут сириттэн быһаҕы булбуттар.

18 саастаах уорбаланааччыга РФ Холуобунай кодексатын 111-с ыст. 2- чааһын «з» пуунунан, ол эбэтэр, сэби-сэбиргэли туттан, доруобуйаҕа ыарахан эмсэҕэлээһини соруйан оҥоруу бэлиэтэ баарынан, холуобунай дьыала тэрилиннэ.

Уорбаланааччы буруйун билинэр көрдөрүү биэрбит. Дьону быстах тутар изоляторга (ИВС) хаайылынна.

Бу сарсыарда социальнай ситимнэринэн тарҕаммыт иһитиннэриинэн, эмсэҕэлээччи Чараҥ орто оскуолатын дириэктэринэн үлэлиир. Ол түүн кэргэнинээн ааһан иһэн, айдаара-охсуһа сылдьар уолаттары буойбуттар. Ону сөбүлээбэккэ, биир уол дириэктэри быһаҕынан анньыбыт.

Биһиги корр., «Саха сирэ» хаһыат, edersaas.ru

Хаартыска: СӨ ИДьМ-тын пресс-сулууспата.

+1
0
+1
0
+1
0
+1
0
+1
0
+1
0
+1
0