Уус Алдан улууһун Түүлээх нэһилиэгэр (Кылаайыга) элбэх функциялаах искибиэр-былаһаакканы арыйыы үөрүүлээх быһыыта-майгыта куйаар ситиминэн ыытылынна.
Искибиэр элбэх оҕолоох ийэлэр ааттарын үйэтитиигэ аналлаах уонна ийэлэргэ, оҕолорго аналлаах сынньанар, оонньуур былаһааккалаах сирдээх. Бу туһунан sakha.gov.ru сурулунна.
Бырайыагы олоххо киллэрэргэ РФ Бэрэсидьиэнэ Владимир Путин 500 тыһыынча солкуобай кээмэйдээх грана тирэх буолбут. Бастакы кэрдиискэ искибиэр тутуллуута, иккискэ — элбэх оҕолоох ийэлэр ааттарын үйэтитиигэ, элбэх оҕолоох дьиэ кэргэннэри киэҥник сырдатыыга, пропагандалааһыҥҥа араас тэрээһиннэри тэрийии киллэриллибит.
Искибиэр бырайыагын Уус Алдан улууһугар оҕолордоох дьиэ кэргэни уонна ыччаты өйүүр кэмиэрчэскэйэ суох пуонда оҥорбут. Бырайыагы Дьокуускай куорат 23 №-дээх оскуола математикаҕа үрдүк категориялаах учуутала, СӨ үөрэҕириитин туйгуна Нина Винокурова салайбыт.
Бырайыагы олоххо киллэрэргэ биэнсийэлээхтэр, ыччаттар, элбэх оҕолоох дьиэ кэргэттэр турунан көмөлөспүттэр. Кинилэри сэргэ, «Полярные авиалинии» генеральнай дириэктэрэ Семен Винокуров өйөбүлү оҥорбут. Онон оҕо былаһааккатыгар тэрили ыларга 300 тыһыынча солкуобай хомуллубут. Бу туһунан СӨ Үлэлээх буолууга уонна социальнай сайдыыга министиэристибэтин пресс-сулууспата иһитиннэрбит.