Тыа хаһаайыстыбата

Уус Алдаҥҥа хаһаайыстыбалар халааҥҥа эрдэттэн бэлэмнэнэллэр

Сааскы  халаантан сэрэхтээх уонна бэлэм буолууга өрөспүүбүлүкэ тыатын хаһаайыстыбатын министиэристибэтэ араас тэрээһиннэри ыытар. Соторутааҕыта тустаах министиэристибэттэн мобилизационнай бэлэмнэниигэ бөлөх салайааччыта В.В.Никитин Уус Алдан улууһугар тахсан, халаан кэмигэр сүөһүнү уонна сылгыны быстах кэмҥэ тутууга үөрэх ыытта уонна ыксалга хайдах дьаһанар былааннаахтарын көрдө-иһиттэ.

Ол курдук, Уус Алданнааҕы тыа хаһаайыстыбатын управлениетын салайааччытын солбуйааччы М.И.Федорованы кытта  Бороҕон, Суотту, Түүлээх, Чэриктэй, Дыгдал нэһилиэктэригэр хороҕор муостааҕы уонна сыспай сиэллээҕи быстах кэмҥэ хаайар пууннарга бу нэһилиэктэр тыа хаһаайыстыбатын исписэлиистэрин, бааһынай хаһаайыстыбаларын баһылыктарын уонна олохтоохтору кытта мустан, кэпсэтии ыыттыллар. Бу пууннар хайдах туруктаахтарын көрөн баран, ыам ыйын 1 күнүгэр диэри күрүөлэри-хаһаалары өрөмүөннээн бүтэрэргэ сорук туруордулар.

Маны сэргэ ойуур уота суоһуур, сааскы, сайыҥҥы үлэлэр кэмнэригэр ууттан сэрэхтээх буолууга эмиэ сүбэ-ама биэрдилэр. Хаһаайыстыбалар сүөһүлэрин, баайдарын-дуолларын айылҕа иэдээниттэн харыстыырга страховка суолтатын өссө тоһоҕолоон бэлиэтээтилэр.

Бэлэмнээтэ Женни Стрюкова

Хаартыска: СӨ тыа хаһаайыстыбатын пресс-сулууспата тиксэрдэ

0
0
Telegram @edersaas20