Ааспыт сыл сэтинньититтэн Уус Алдан улууһугар ардай аһыылаахтар сылгылары тардаллара чаастатыйбыт.
Бу туһунан улуустааҕы тулалыыр эйгэни кэтээн көрөр иниспиэксийэттэн иһитиннэрбиттэр. Адьырҕалар сүрүннээн Найахы, Дүпсүн, Өнөр, Бээрийэ нэһилиэктэрин диэки бааллара бэлиэтэнэр. Сыл устатыгар тоҕус бөрөнү сууһарбыттар, итинтэн үһүн быйыл, 2021 сылга.
Улуус дьаһалтата иниспиэксийэни кытта сүбэ мунньах тэрийбиттэр. «Адьырҕаны сууһарыыга ыстаапканы сүбэ 5000 солкуобайынан үрдэттэ. Онон 15 000 солкуобайга тэҥнэстэ. Ону сэргэ, бөрөнү боҕутуннарбыттарга уматыктарын ночоотун сороҕо толуйуллар», — диэн иһитиннэрэллэр. Оттон өрөспүүбүлүкэ биологическай ресурсаларга дириэксийэтэ, бэйэтин өртүттэн, 40 хапкаан, туһахха 500 миэтэрэ торуос, 600 лиитэрэ АИ-92 бэнсиин биэрбит.
Найахыга, Дүпсүҥҥэ бөрөһүттэр биригээдэлэрэ тэриллибит, өссө сэттэ нэһилиэккэ бөрө ахсаанын алыс элбэппэт туһуттан, булчуттар көҥүл ылбыттар.
+1
+1
+1
+1
+1
+1
+1