СӨ бырабыыталыстыбатын бэрэссэдээтэлин солбуйааччы Алексей Колодезников навигация тэрээһинин туһунан бырабыыталыстыба хамыыһыйатын мунньаҕар бэлиэтээбитинэн, хотугу улуустарга таһаҕас таһыыта түмүктүүр түһүмэҕэр тиийэн эрэр.
Быйылгы навигация былаанынан, 1 179 400 туонна мал хотугу улуустарга тириэрдиллиэхтээх. Бүгүҥҥү күн туругунан, 1 134 000 туонна тиэйиллэн, былаан 96,1% туолла. Навигация былаана туолан испитин да иһин, Дьааҥы өрүһүнэн таһаҕас тиэйиитэ анал хонтуруолга турар.
Дьокуускайдааҕы гидрологическай сулууспа салайааччытын солбуйааччы Юрий Дихтяренко биллэрбитинэн, Дьааҥы өрүс уутун таһыма навигацияны атахтаабат.
Уунан сырыы ыйыллыбыт кэмигэр тохтуоҕа. Дьааҥы — Баатаҕай — Куйга туһаайыытынан сырыы балаҕан ыйын 16 күнүгэр тохтоото.
Николай Попов, «Саха сирэ» хаһыат, edersaas.ru