Коронавирус пандемията туран, өрөспүүбүлүкэҕэ уһун өрөбүллэри биллэрбиттэрэ. Бэнидиэнньиккэ — бастакы күҥҥэ уулуссаларга киһи биллэ аҕыйаабыт.
edersaas.ru
Салгын сии таарыйа куорат уулуссаларынан хаамтым. Киһи олох көстүбэт. Массыыналары эрэ көрүөххэ сөп. Оптуобустар биирдии-иккилии киһилээх эрэ ааһаллар.
Маҕаһыыннар, эрэстэрээннэр, остолобуойдар бары сабыылаахтар.
«Лена» киинэ тыйаатырын диэки дьоҕус эрээри, эдэрдиин-эмэнниин мустар спортивнай былаһааккаҕа бэйэм курдук салгын сии сылдьар дьону көрсөн кэпсэттим. Устудьуон уолаттар: «Дьарыктанар саалабытын сабан кэбиспиттэрэ. Ол иһин манна кэлэн дьарыктанан ыллыбыт. Билигинн уопсайбытыгар барыахпыт. Дьарыктана сылдьыбыт дьон дьиэҕэ олорорго тэһийбэппит, ол эрээри бэйэни харыстанар наада«, — диэн санааларын үллэстэллэр.
Уолаттар аттыларыгар сылдьар куорат олохтооҕо дьахтар: «Күнү быһа ас астыыбын. Бу күннэргэ таһырдьа тахсыбакка сытан, бүгүн салгын сиэн киирэргэ сананным.
Маннык үчүгэй кэмҥэ дьиэҕэ хаалан олордохпут. Аҕыйах ый нэдиэлэ иннинэ дьоллоохтук да күлэ-үөрэ, көнүлгэ сылдьыбыт эбиппит. Бу күннэргэ хас биирдии киһи тус олоҕун сыаналаата быһыылаах. Олох атын олох саҕаланна«, — диэн бэлиэтээтэ.
Кураанах уулусса — дьиссипилиинэ бэлиэтэ. Ол эрээри, киин уулуссаларга чугаһаан истэххэ, дьон баара биллэн барда. «Токко» маҕаһыын (уруккута «Туймаада») утары оптуобус тохтобулугар балачча киһи турар.
Ойуунускай уулуссатынан ааһан иһэн көрдөххө, киһи манна да үгүс эбит.
Аара баран иһэн, толору бакыаттаах үгүс ыччаты көрдүм. Бу волонтердар диэн киһи тута сэрэйэр. Онно-манна тиэтэйэр киһи үгүһэ чахчы. Уһун өрөбүл бастакы күнэ буолан буолуо, дьон сыыйа дьиэтигэр олорон эрэр эбит диэн санааҕа кэллим.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.