Илиҥҥи экономическай форумҥа Уһук Илин эрэгийиэннэригэр дьиэ сыанатын түһэрэр туһуттан, саҥа кыбартааллар тутуллуохтарын туһунан кэпсэтии барбыта. Уһук Илин уонна Арктика сайдыытын министиэристибэтэ тоҕус эрэгийиэни кытары дуогабар түһэрсибитэ.
Ол курдук, Сахалин, Амур уобаластарыгар, Еврейскай автономнай уобаласка, Бурятияҕа, Камчаткаҕа, Забайкальеҕа, Приморьеҕа, Хабаровскайга уонна Саха сиригэр “Уһук Илин кыбартааллара” диэн ааттаах аныгы үйэ сиэринэн биир ситимнээх кыбартааллар тутуллуохтара. Кыбартааллар уопсай иэннэрэ 2,1 мөлүйүөн кв м тэҥнэһэр. Бу кыбартааллар эрдэ тэриллибит урутаан сайдар сирдэр чэрчилэринэн тутуллаллар. Онон тутааччылар нолуок чэпчэтиилэринэн туһаныахтара, кыбартааллар инфраструктураларын оҥорууга судаарыстыбаттан көмөнү ылыахтара. Ол оннугар дьиэлэр сыаналара намыһах буолуоҕа.
Улахан эбийиэктэртэн ыллахха, бу бырайыагынан Владивосток таһыгар улахан кыбартаал тутуллуохтаах. Уһук Илин сайдыытын миниистирэ Алексей Чекунков пресс-конференцияҕа иһитиннэрбитинэн, кыбартаал олоххо киирдэҕинэ дьиэ сыаната лаппа түһүөхтээх.
– Уһук Илин федеральнай уокурукка киирбит чэпчэтиилэр (Уһук Илиҥҥи, дьиэ кэргэн, судаарыстыба кыттыгастаах ипотекалар) дьиэлэр хамаҕатык атыыга барыыларын хааччыйдылар. Ону сэргэ, дьиэҕэ наадыйааччы киһи элбэх буолан, тутуу ырыынагар сыананы таһаардылар. Онон саҥа дьиэлэри тутууга “Уһук Илиҥҥи кыбаартал” диэн бырайыагы олоххо киллэрэн эрэбит. Бу бырагыраама чэрчитинэн, Владивостокка эрэ буолбакка, бары эрэгийиэннэргэ олорор дьиэлэри тутуу элбиэҕэ, дьиэ сыаната да түһүө этэ, – диэн бэлиэтиир Алексей Олегович.
Саха сиригэр бу бырайыагынан Дьокуускайга уонна Нерюнгрига саҥа кыбартааллар киириэхтээхтэр. Ол курдук, Дьокуускайга 160 тыһыынча кв м иэннээх “Байыаннай” кыбартаал тутуллуоҕа.
Бастакы вице-премьер Кирилл Бычков иһитиннэрбитинэн, кыбартаал бастакы дьиэлэрэ эһиил номнуо үлэҕэ киириэхтээхтэр. Оттон Нерюнгрига 100 тыһыынча кв м иэннээх кыбартаалга, бастатан туран, оройуоҥҥа үлэлии сылдьар улахан хампаанньалар үлэһиттэрэ көһөн киириэхтэрэ. Кэнэҕискитин Нерюнгрига 2,5-3 тыһыынча үлэ миэстэтэ арыллаары турар. Былаан быһыытынан, 2024 сылга диэри 65 тыһыынча кв м иэннээх дьиэ тутуллуохтаах. Хаалбыт 35 тыһ. кв м 2027 сылга диэри тутан киллэриэхтэрэ.
Ил Дархан Айсен Николаев эрдэ бэлиэтээбитинэн, бу бырайыак үс сыл иһигэр, ордук Дьокуускай куоракка, олорор дьиэлэри тутууну элбэтиэҕэ, ону таһынан хаарбах дьиэ ахсаанын аҕыйатыаҕа.
Аграфена КУЗЬМИНА.