Бу нэдиэлэ саҕаланыыта Хаҥалас улууһугар өрөспүүбүлүкэтээҕи ыччат ыһыаҕын тэрийэр хамыыһыйа мунньаҕа буолла. Ыһыах бэс ыйын 19-21 күннэригэр «Орто Дойду» комплекска ыытыллыаҕа, манна 800 кэриҥэ кыттааччы кэлэрэ күүтүллэр.
Суолталаах мунньаҕы СӨ бырабыыталыстыбатын бэрэссэдээтэлин солбуйааччы Михаил Гуляев салайан ыытта: «Билиҥҥи туругунан бэлэмнэнии үлэтэ бара турар — ыһыах буолар сирин өрөмүөннээһин, киэргэтии, туох-ханна буоларын түһүлгэлэринэн араарыы уо.д.а. Бу үлэлэр барыта бэс ыйын 15 күнүгэр диэри бүтүөхтээхтэр. Ыһыах арыллыытын уонна сабыллыытын сиэрин-туомун хайдах ыытарбытын толкуйдуубут. Ону тэҥэ, ыһыах сүрүн бириистэрин быһаарсабыт. Урукку сылларга кыайыылаах улуустар УАЗ-массыыналарынан наҕараадаланааччылар».
Санатар эбит буоллахха, былырыыҥҥы ыһыах Мирнэй куораттан уонтан тахса биэрэстэ тэйиччи сытар, 2011 сыллаахха Олоҥхо ыһыаҕа ыытыллыбыт Чуоналыыр диэн сиргэ буолбута. Үс күн устата өрөспүүбүлүкэбит араас муннугуттан мустубут 33 хамаанда үс бөлөххө арахсан уонча көрүҥҥэ күөн көрсүбүтэ. Киин оройуоннар, хоту оройуоннар уонна уопсастыбаннай түмсүүлэр түһүлгэҕэ ох курдук оҥостон кэлбиттэрэ. Сүрүн бириис быһыытынан икки УАЗ массыына турбута — биирин Ыччат министиэристибэтэ, иккиһин улуус дьаһалтата уйуммута. Уопсай түмүккэ киин оройуоннарга Мэҥэ Хаҥалас улууһун хамаандата, хоту оройуоннарга — Томпо улууһун хамаандата, уопсастыбаннай түмсүүлэргэ — ХИФУ устудьуоннарын идэлээх сойууһа бастаабыттара.
Айтана Аммосова, edersaas.ru