Неонатальнай скрининг диэн оҕо төрөөтүн кытта хайыы үйэ бастакы күннэригэр улахан патологиялары дьоһуннаахтык чинчийиини ааттыыллар.
edersaas.ru
Арассыыйа Доруобуйа харыстабылын министиэристибэтин мэдиссиинискэй генетикаҕа штаты таһынан кылаабынай исписэлииһэ Сергей Куцев киэҥник ылыллар неонатальнай скрининг сылга 2000-тан кырачааны быыһарга көмөлөһүө диэн иһитиннэрдэ.
— Биһиги ааҕарбытынан, 36 утумнуур ыарыыга маассабай кэтээн, неонатальнай скринини оҥоруу сылга 2000 тахса кырачаан олоҕун быыһыаҕа. Скринини ыытарга нуорма докумуоннара оҥоһулуннулар. Бэйэлэригэр неонатальнай скринини оҥорор, утумунан бэриллэр ыарыылаахтарга мэдиссиинскэй көмө оҥоһулларын уонна эминэн хааччыллыыны кэтээн көрөр эрэгийиэннэр икки ардыларынааҕы кииннэр эмиэ быһаарылыннылар.
Номнуо билигин сэдэх (орфаннай) ыарыылаах сорох оҕолор эминэн хааччыллаллар, инникитин оҕо ыарыыта эрдэ билиннэҕинэ, эминэн хааччыйыы кыаллыан сөп.
Хомойуох иһин, билигин даҕаны аан дойдуга барытыгар сэдэх (орфаннай) ыарыылаахтар үгүстэрэ чопчу диагноз оҥоһуллубакка, араас исписэлиискэ сылы-сыллаан кэтэбилгэ сылдьарга күһэллэллэр.
Онон, 36 ыарыыга маассабай неонатальнай скрининг үгүс эмтэниини эрдэ (эмтэнии туһалыыр кэмин мүччү туппакка) саҕалыырга, оҕо толору сайдарыгар көмөлөһүөҕэ.
Надежда ЕГОРОВА, «Саха сирэ», edersaas.ru