Утум салҕанар, ситим быстыбат. Чулуу суруналыыстар ааттарынан бириэмийэлэр туттарылыннылар
Лука КОЛЕСОВ, Иван БРЫЗГАЛОВ, Реворий КРИВОГОРНИЦЫН – саха тыллаах ааҕааччыга сытыы бөрүөлээх суруналыыс, хомоҕой тыллаах суруксут, чаҕылхай публицист быһыытынан хайа да кэмнэргэ дириҥ ытыктабылынан ахтыллар суруналыыстар.
Быйыл чулуу суруналыыстар ааттара, “Саха сирэ” хаһыат кылаабынай эрэдээктэрэ Родион Кривогорницын көҕүлээһининэн, хаһааҥҥытааҕар даҕаны дорҕоонноохтук ааттаннылар. Ол курдук, Арассыыйа бэчээтин күнүгэр оҕолоро, чугас хаан-уруу аймахтара, өр сыл айымньылаахтык үлэлээбит тапталлаах “Саха сирэ” хаһыаттарын эрэдээксийэтин бастыҥ суруналыыстарыгар кинилэр ааттарынан бириэмийэлэри туттардылар.
Саха Өрөспүүбүлүкэтин култууратын үтүөлээх үлэһитэ, Ем. Ярославскай аатынан суруналыыстар бириэмийэлэрин лауреата, бэчээт бэтэрээнэ Иван Иванович Брызгалов бочуоттаах сынньалаҥҥа тахсан баран, эрэдээксийэтигэр көмөлөһөр, эдэр суруналыыстары өйүүр сыаллаах бэйэтин аатынан бириэмийэни өссө 2003 сыллаахха олохтообута. Иван Иванович бириэмийэтин сыл аайы Бэчээт күнүгэр Майаттан айаннаан кэлэн, эрэдээксийэ бастыҥ эдэр кэрэспэдьиэнигэр үөрүүлээх быһыыга-майгыга туттарара. Бэчээт үлэһиттэрин сэмэй, бырааһынньыктааҕы сандалыларыгар аксакалбыт кэһиитэ – сыалаах убаһа ойоҕоһо кэчигирэччи быһыллан турарын биһиги эмиэ улахан махталынан саныыбыт.
Иван Брызгалов аатынан бириэмийэ бастакы лауреаттарынан эдэр суруналыыстар Анивера Акимова, Прокопий Бубякин, Александр Тарасов, Сардаана Кузьмина, онтон да атыттар буолбуттара, кинилэр лауреат үрдүк аатын чахчы даҕаны чиэстээхтик тутан кэллилэр. Кэлин Иван Иванович бу Орто дойдуттан барбытын кэннэ кини аатынан бириэмийэни кэккэ сылларга дьиэ кэргэнэ туттарбыта. Онтон быйыл ытыктабыллаах Иван Брызгалов аатынан бириэмийэни уола юстиция бэтэрээнэ Александр Иванович Брызгалов сөргүтэн, эдэр кэскиллээх суруналыыска Айтана Аммосоваҕа туттарда.
Үтүө үгэс салҕааччылардаах, үтүө холобур батыһааччылардаах
Быйыл, 2019 сыл тохсунньутугар, Бэчээт күнүгэр, үлэ, тыыл, суруналыыстыка бэтэрээнэ, Саха Өрөспүүбүлүкэтин култууратын үтүөлээх үлэһитэ, “Бочуот Знага” уордьан кавалера Лука Гавриилович Колесов аатынан бириэмийэни кыыһа Галина Лукинична Колесова олохтоон, “Хаһыат уонна ааҕааччы” рубриканы айымньылаахтык үлэлэтэр суруналыыс Женни Стрюковаҕа туттарда.
Женни СТРЮКОВА, Лука Колесов аатынан бириэмийэ лауреата:
— Бастатан туран, ытыктабыллаах Лука Гавриилович кыыһыгар Галина Лукиничнаҕа, аҕатын аатын үйэтитэн, бу бириэмийэни олохтообутун иһин дириҥник махтанабын. Лука Гавриилович Колесов саха суруналыыстыкатын аксакала этэ. Хаһыакка кини сурук салаатын салайар кэмигэр ааҕааччылар олус элбэхтик суруйаллара. Аҥаардас тыа сирин кыһалҕаларын сырдатар салааҕа сылга 1000-тан лаппа тахсалыы сурук киирэрэ. Кини тылга олус ымпыктык сыһыаннаһарын бэлиэтии көрбүтүм. Хас нүөмэр таҕыстаҕын аайы хаһыаты сиһилии ааҕан, хайаан даҕаны хайа эрэ тылы аннынан тардыбыт буолара. Сиэрдээхтик мөккүһэрин, аһаҕастык санаа атастаһарын сөбүлүүрэ. Кэнники сылларга тылбаасчыттары салайан, бэрт таһаарыылаахтык үлэлээбиттэрэ. Мин Лука Колесов курдук чаҕылхай суруналыыстан элбэххэ үөрэммиппинэн киэн туттабын!
Сытыы бөрүөлээх суруналыыс, СӨ Бэчээтин туйгуна Реворий Михайлович Кривогорницын аатынан бириэмийэни кини оҕолоро Айаал Реворьевич уонна Сардаана Реворьевна олохтооннор, СӨ култууратын үтүөлээх үлэһитигэр, “Саха сирэ” хаһыат тэриллиэҕиттэн таһаарыылаахтык үлэлии-хамсыы сылдьар бэчээт бэтэрээнигэр, айар куттаах Иван Ксенофонтовка анаатылар.
Татьяна МАРКОВА, «Саха сирэ» хаһыат, edersaas.ru