Хатас сэлиэнньэтин «Тускул» Култуура киинин иһинэн үлэлиир түмсүүлэртэн биир таһаарыылаах көрдөрүүлэрдээх, сыралаах үлэлээх түмсүүнэн »Утум иис» буолар.
edersaas.ru
Быйыл саас сүбэлэһэн баран, Аҕа дойду Улуу сэриитигэр Кыайыы 75 сылын көрсө Хатас нэһилиэгин тыыл бэтэрээннэригэр олбох тигэн бэлэхтээн үөрдүбүттэрэ.
Оттон соторутааҕыта, ыраах Бразилия олохтоохторун кытта куйаар нөҥүө быһа сибээһинэн »Дьиэҕэ олорон айанныыбыт» бырайыакка саха омук дьахтара хайдах курдук талааннааҕын эмиэ кинилэр үлэлэринэн көрдөрбүппүт. Онно сүрүн дьоруойдарынан Анна Пестерева уонна Мария Дегтярёва үлэлэрэ буолбута. Ордук кыбытыы тигиини, ат толору киэргэлин сэргээбиттэрэ.
Көмүс күһүн күннэрин көмүс чаҕылыгар чахчы да көмүс тарбахтаах, дьулуурдаах үлэһит Мария Дегтярёва тикпит соннорун (бэргэһэлээх, үтүлүктээх) кэтэн Совхознай уулусса устун саха буолалларынан киэн тутта, дэлэччи-хоточчу, холкутук, дьоһуннук хаамтылар. Онтон нэһилиэк дьоно таптыыр сиригэр «Күөх сирэмҥэ» киирэн, өҥ-дьүһүн дьикти суһумугар сууламмыт мастарга хаартыскаҕа түһэн, Мария үлэлэрин үйэтиттилэр. Анна Пестерева былырыын Санкт-Петербург куоракка улахан сэҥээриини ылбыт үлэтин (сонун, бэргэһэтин, үтүлүгүн) быйыл өссө ситэрэн биэрбитэ көстүүтэ өссө кэрэтийбит. Дьэ биир саас, сайын иһигэр дьоһун үлэ. Харах халтарыйар мааныта, сүрэх өрүкүйэр кэрэтэ.
«Саха сирэ» хаһыакка, edersaas.ru саайтка анаан Наталия РУФОВА