Дьаҥҥа хаптарбыт ыарыһах олорор усулуобуйата учуоттанар буолла

Ааптар: 
08.11.2020
Бөлөххө киир:

COVID-19 дьаҥынан ыалдьыбыт дьон, өскөтүн  кинилэр олорор усулуобуйалара эппиэттиир уонна  быраас быһаарыытынан эмтэниини тутуһалларын мэктиэлиир буоллахтарына, дьиэлэригэр эмтэниэхтэрин сөп.

 edersaas.ru

Бу туһунан сэтинньи 8 күнүттэн күүһүгэр киирэр РФ Доруобуйа харыстабылын бирикээһигэр этиллэр. Уопсай уонна коммунальнай дьиэҕэ олорор уонна дьиэлэригэр кырдьаҕастары кытта олорооччу, хроническай ыарыылаах дьон  балыыһаҕа эрэ эмтэнэллэр.  Урут туруктара ама дьон дьиэлэригэр эмтэнэллэрин сүбэлииллэрэ. Маныаха олорор усулуобуйалара учуокка ылыллыбат этэ. Билигин докумуоҥҥа бу чааһыгар көннөрүү киирдэ.

Маны таһынан, бу бирикээһинэн бырааһы дьиэҕэ эмтэнэр киһи туруга мөлтөөтөҕүнэ, хайаан даҕаны кинини ыҥырыахтааҕын туһунан сэрэтэрэ эбээһинэстэннэ. Өскөтүн  ыарыһах дьиэтигэр хас да киһи олорор буоллаҕына, эмчит ол дьону бу ыарыы сыстыганнааҕын, онон ыалдьар киһиттэн атын сиргэ олоруохтаахтарын туһунан сэрэтэрэ наадалааҕа бирикээскэ эмиэ ыйыллар. Өссө эмчит квартираннарга санитарнай-эпидемиологическай быраабыланы кэһии иһин холуобунай эппиэтинэскэ тардыллыахтарын сөбүн туһунан сэрэтиэхтээх. Эбиитин бирикээскэ быраас ыарыһахха уонна кини чугас дьонугар ыарыһаҕы көрүү-истии туһунан уонна респираторнай инфекцияттан харыстаныы туһунан сүбэ брошюраны биэриэхтээҕэ ыйыллар.

Маны тэҥэ, Доруобуйа харыстабылын министиэристибэтэ «ковид» ыарыыттан үтүөрбүт дьон анаалыстарын «отрицательнай» түмүгүн балыыһаҕа сытан кэтэспэккэ эрэ, дьиэлэригэр тахсан эмтэнэ сытан кэтэһиэхтэрин сөбүн туһунан бу бирикээһигэр бэлиэтээтэ.

Бу туһунан СИА иһитиннэрэр.

Елена ПОТОЦКАЯ, «Саха сирэ» хаһыат», edersaas.ru

Хаартыска — СИА.

+1
0
+1
0
+1
0
+1
0
+1
0
+1
0
+1
0