Уопсастыба

Усуйаанаҕа күнү көрүстүлэр



Хараҥа, уһун хотугу түүн кэнниттэн Усуйаанаҕа күн бастакы сардаҥаларын уруйдуу көрүстүлэр. Күнү көрсүү үөрүүтүгэр тохсунньу 24 күнүгэр Депутатскай олохтоохторо киин болуоссакка муһуннулар. Сыл аайы бу тэрээһин үгэскэ кубулуйда.

edersaas.ru

 

Күн диэн – олох, күн диэн – сылаас уонна сырдык. Туох баар тыынар тыыннаахха, үүнээйигэ, хамсыыр харамайга  күн суолтата олус улахан. Ону үс ый кэриҥэ хараҥа, тымныы түүҥҥэ баттатан олорбут хоту дойду олохтоохторо үчүгэйдик билэллэр, сыаналыыллар.

Күнү көрсүү үөрүүлээх сиэригэр-туомугар алгысчыт Иван Слепцов сир-дойду, уот иччилэрин алҕаан аһатта. Мустубут дьон-сэргэ күн бастакы сардаҥаларынан ыраастаныы туомун ыыттылар, арчыланнылар, күүс-сэниэ эбиннилэр. Ол кэнниттэн бары илии-илиилэриттэн ылсыһан, һээдьэлээн сэгэйдилэр. Эбээннэр төрүт астарын амсайдылар.

Үөрбүччэ-көппүччэ, күүһү-уоҕу, сымсаны холонон көрүүгэ Клавдия Чукрова уонна Яков Находкин кыайыылааҕынан таҕыстылар.

 

Бу — интэриэһинэй 

Хотугу эргимтэҕэ күнү көрсүү бырааһынньыга араас куораттарга эмиэ ыытыллар. Холобур, Мурманскайга тохсунньу 11 күнүгэр олохтоохтор бары кэриэтэ Солнечная горка диэн ааттаах,  саамай үрдүк мырааҥҥа тахсан, күннэрин көрсөллөр. Бу түгэҥҥэ күн 14 эрэ мүнүүтэ көстөн ылар эбит.  Ону уруйдаан, бу күн Мурманскай олохтоохторугар барыларыгар бырааһынньык курдук буолар. Дьону анал оптуобустар мырааҥҥа диэри таһаллар.

 

Ангелина Васильева, “Саха сирэ” хаһыат, edersaas.ru

0
0

Санааҕын суруй