90-с сыллар бүтүүлэрэ, биир ылааҥы сааскы өрөбүл күн, кэргэним куукунаҕа ас астыы сылдьан түннүгүнэн көрбүтэ оҕолор охсуһан эрэллэр эбит. Миэхэ тахсан буойталаа, онтуларын-мантыларын өлөрүөхтэрэ диэтэ. Мин түргэн соҕустук таҥнаат тахсыбытым, 11-с уонна 9-с дьиэ икки ардыларыгар табаарыһым Миисэ Оруоһун уолаттара Феликстаах Родионы уонча уол көмөлүү сатыы сылдьаллар эбит. Феликстаах Родик сыстыһа турбуттар уонна бэйэлэриттэн өндөс уолаттары кытта биэртэлэһэ тураллар эбит. Сөҕө санаабытым, улаханнык хотторботохтор, хата анаарааҥы уолаттар сирэйдэрэ-харахтара мөлтөх соҕус этэ. Оччолорго, билигин кэлэн туох кистэлэ кэлиэй, Усуйаана улууһун киинэ, Депутатскай бөһүөлэгин оскуолатын сорох учууталларын уонна үөрэнэччилэрин ортолоруттан нэһилиэктэртэн кэлбит оҕолорго сэнэбиллээх, хаҕыс соҕус сыһыан баара. Онно арыый саастарынан улахан соҕус уолаттар Феликси “тоһута” сатаан, сынньа сатаабыттара кыаллыбатах эбит. Кэлин аҕаларыгар Миисэҕэ эппиппэр, кыратык да хоҥоруутугар хоҥнорботоҕо: “ уол оҕо бэйэтин көмүскэниэхтээх, хата кими эмит кырбаабыттара буоллар кэһэтэлиэм этэ”, диэн хоруйдаабыта. Онон Феликстаах Родик Депутатскайга туруулаһан туран “күн анныгар сирдэрин” олохтоохтук булбуттара. Биир табаарыһым, уруккута Усуйаана оройуонун милииссийэтин тойоно Өлөксөөндүр Ньукулаайап бэлиэтээбитинэн – Феликс лидер хаачыстыбалаах уол, боотурдуу куттаах-сүрдээх, лаппа кыанар, үөрэҕэр үчүгэй, бэйэтин тула оҕолору түмэ тардар.
Феликс алын кылаас учуутала Валентина Робертовна уонна дэгиттэр мэхэнисээтэр Михаил Васильевич Оруоһуннар дьиэ кэргэнигэр Силээннээх нэһилиэгэр күн сирин көрбүтэ. Алын кылаастарга үөрэнэ сылдьан дьонун кытта Депутатскай бөһүөлэгэр көһөн кэлбиттэрэ. Феликс дьоллоох оҕо сааһа онон Сайылык уонна Депутатскай сиригэр ааспыттара. Икки эбээтэ, эһээтэ Усуйаана улууһугар ытыктанар дьон, атыыга-эргиэҥҥэ, сибээскэ, сопхуоска бары күүстэрин биэрэн үлэлээбиттэрэ. Феликс билигин даҕаны икки эбээтигэр кыратык атаахтаан ылар. Эбээлэрэ туох эмит сонун астаннахтарына сиэннэригэр кэһии гынан ыыта тураллар. Орто оскуоланы Депутатскайга бүтэрэн баран, эдэр уол дьоллоох Дьокуускай куоракка үөрэнэ барбыта. Спорка сыһыаннаах уол, физкультура учуутала буолар баҕалаах 1-кы нүөмэрдээх Дьокуускайдааҕы педагогическай колледж устудьуона буолбута. Үөрэнэр сылларыгар колледж общественнай уонна спортивнай олоҕор актыыбынайдык кыттара. Гиирэ спордунан утумнаахтык дьарыктанан кэккэ ситиһиилэрдэммитэ. Ол курдук хаста да куорат чөмпүйүөнэ буолбута, Саха сирин, Манчаары спартакадиадатын призера буолбута. 2008 сылга СӨ спордун силовой көрүҥнэрин 9-с фестивалыгар бастакы миэстэни ылан маастар нуорматын толорбута. Устудьуоннуур сыллара түргэнник элэс гынан ааспыттара, үөрэҕин бүтэрбит уол дойдутугар Депутатскайга тренер-учууталынан оҕо-ыччат спортивнай оскуолатыгар ананан кэлбитэ. Үлэлии-үлэлии ХИФУ-га үөрэҕин үрдэтиммитэ. Эдэр, хамсаныылаах, киириилээх-тахсыылаах уолу бэлиэтии көрөн улуус дьаһалтатыгар “Физкультура уонна спорт салалтата” диэн МКТ-га 2014 сыллаахха үлэҕэ ыҥырбыттара. Эһиилигэр үлэлиир тэрилтэтин салайааччытын солбуйааччытынан анаабыттара. Феликс аҥаардас үлэтинэн эрэ муҥурдаммат, спортивнай уонна общественнай үлэҕэ эмиэ көхтөөхтүк кыттар. Ол курдук “Эдэр гвардия” бүтүн Россиятааҕы түмсүү чилиэнэ, “Биир ньыгыл Россия” партия Усуйаанатааҕы сэбиэтин бэрэссэдээтэлэ. Билигин Феликс Михайлович элбэх былаанн аах, атын да проблемалартан туора турбат, дьон норуот кыһалҕатын өйдөөн куруук көмөлөһө сатыыр. Онон киһи ыччаттаахпын диир ыччата. Оннук эрэ буоллун диэххэ, уонна эдэр уолу, быһа эппэккэ, хайдах үүнэрин-сайдарын аргыый кэтээн көрүөххэ…..
Иван Андреев, «Саха сирэ», edersaas.ru