Усуйаана улууһун «Таба-Яна» кэпэрэтиип күһүҥҥү хараал үлэтин түмүктээн эрэр.
edersaas.ru
Бэтэринээрийэ департаменыттан бэтэринээр быраас А.Н.Максимов кэпэрэтиип Хаһааччыйа нэһилиэгэр баар 1 №-дээх ыстаадатыгар тиийэн көмөлөстө. Хаһаайыстыба ааҕыы түмүгүнэн 3 тыһ.145 табалаах, ол иһигэр 1 тыһ. 119 ийэ таба, 800 тугуттаах. Табалар туруктара этэҥҥэ, ырыганнаабыт, ыалдьыбыт суох.
Бэтэринээрдэр табаларга Сибиир дьааспатын, бруцеллез, ииригирии, некробактериоз курдук ыарыылары сэрэтэр быһыылары биэрдилэр, бруцеллезка серологическай чинчийиилэри оҥордулар, РБП (роз-бенгал) ньыматынан боруоба ыллылар.
Кинилэри кытары «Сахаагроплем» ГБТ зоотехнига А.В.Дьячковскай сылдьыһан, электроннай учуоту оҥордо, 1400 табаҕа чип туруорда. Биллэрин курдук, таба хаһаайыстыбалара сааскы төрүөх кэнниттэн итиэннэ күһүн баччаларга харааллааһыны ыыталлар: табаларын түмэн ааҕаллар, саастарынан уонна аналларынан наардаан араараллар, итиэннэ эмтиир-сэрэтэр дьаһаллары тэрийэллэр. Хараал кэнниттэн кыһыҥҥы маршруттарынан бараллар.
Раиса Сибирякова, «Саха сирэ» edersaas.ru