Сүрүн Уопсастыба

Усуйаана бастыҥ табаһыта – Арассыыйа тыатын хаһаайыстыбатын үтүөлээх үлэһитэ!



Саҥа дьыл үүнүөн эрэ иннинэ тэрилтэ үлэһиттэрин уонна өрөспүүбүлүкэ уопсастыбаннаһын кытары көрсүһүүгэ Ил Дархан бастыҥ үлэһиттэргэ судаарыстыбаннай наҕараадалары туттарда.

edersaas.ru

Наҕараадаламмыттар ортолоругар Усуйаана улууһуттан «Таба-Яна» кэпэрэтиип бастакы ыстаадатын биригэдьиирэ, Усуйаана улууһун бочуоттаах гражданина Сергей Филиппов баар. Кини табаны иитиигэ өр сыллаах сыралаах үлэтэ сиэрдээхтик сыаналанан, «Арассыыйа тыатын хаһаайыстыбатын үтүөлээх үлэһитэ» буолла. Удьуор табаһыт ыал оҕотун быһыытынан, Сергей Кимович табаны иитиигэ кыра сааһыттан сыстыбыта. 1990-с сылларга эстибит сопхуос чээрэтигэр тэриллибит кэпэрэтиип биир тутаах үлэһитэ буолбута, кырдьаҕас табаһыттары солбуйан, табаны иитии уустук үлэтигэр эбэх эдэр киһини уһуйан таһаарда. Өрөспүүбүлүкэ үрдүнэн таба ахсаана түһэ турар кэмигэр, кини биригээдэтин көрдөрүүтэ тупса, табата эбиллэ турар. Ол курдук, 2012-2016 сс. ыстаада табатын ахсаанын 607 табанан эптэ, атын ыстаадаларга 817 табаны биэрдэ, судаарыстыбаҕа 60 туонна эти туттарда. Табаһыттар улуустааҕы күрэхтэһиилэригэр 2005 сылтан аҕыс төгүл бастаата, ону сэргэ улууска да, өрөспүүбүлүкэҕэ да тэриллэр Табаһыттар сүлүөттэригэр көхтөөхтүк кыттар, үлэ көрдөрүүлэригэр бастакы миэстэлэртэн түспэт.

Сергей Кимович балыксыт, бөрөһүт быһыытынан эмиэ биллэр, кэнники кэккэ сылларга тус бэйэтэ уон икки ардай аһыылааҕы уодьуганнаата. Уопуттаах биригэдьиир бэйэтин оҕолорун эмиэ кыра саастарыттан табаны иитии мындырдарыгар үөрэтэн, билигин уолаттара уонна кыыһа аҕаларын кытары бииргэ үлэлииллэр, кини үлэҕэ уһуйбут икки аймаҕа «Таба-Яна» кэпэрэтиип 11-с уонна 3-с №-дээх ыстаадаларыгар таһаарыылаахтык үлэлии, биригэдьиирдии сылдьаллар. Сергей Филиппов курдук идэлэригэр бэриниилээх, үтүө үлэһит дьонноох буолан, «Таба-Яна»  кэпэрэтиип табаны иитии салаатыгар  өрөспүүбүлүкэ биир бастыҥ көрдөрүүлээх хаһаайыстыбата буолар.   

Анатолий Слепцов, «Саха сирэ» edersaas.ru. сайтка анаан.

3
0

Санааҕын суруй