Бу күннэргэ бүтүн Арассыыйатааҕы биэрэпис өрөспүүбүлүкэ 15 оройуонун ыраах сытар нэһилиэнньэлээх пууннарыгар саҕаланна.
Ол иһигэр Усуйаана улууһугар. Бүтэһик ыытыллыбыт биэрэпис чахчыларынан, улууска 8056 киһи олороро бэлиэтэммитэ. Оттон отучча сыл анараа өттүгэр, 1989 сыллаахха, Усуйаанаҕа 41 тыһыынчаттан тахса нэһилиэнньэлээх өрөспүүбүлүкэ биир улахан улууһунан аатырара. Ол гынан баран, Сэбиэскэй сойуус эстиэҕиттэн, бырамыысыланнас тэрилтэлэрэ сабыллан, үгүс дьон хоту сиртэн көһөргө күһэллибиттэрэ. Инньэ гынан билиҥҥи туругунан Усуйаана 7000 тахса эрэ нэһилиэнньэлээх.
Улуус биир улахан бөһүөлэгэр – Хаһааччыйаҕа биэрэписчиттэр Мария Горохова, Евдокия Реброва, Вероника Федорова үлэлэрин саҕалаан, бастакынан аҕам саастаахтарга анкета толоттордулар диэн ulus.media саайтка Усуйаана суруналыыһа Иван Андреев иһитиннэрдэ. Хаһааччыйа улуус кииниттэн 213 км сиргэ баар. Билиҥҥи туругунан 1100 тахса нэһилиэнньэлээх (2010 сыллаахха 1367 киһи олороро).
Оттон Муома улууһугар муус устар 12 күнүнээҕи туругунан биэрэписчиттэр номнуо 703 дьиэҕэ сылдьан, 2162 киһини биэрэпистээбиттэр. Бу уопсай ахсаан 56,7% ылар диэн Судаарыстыбаннай статистика федеральнай сулууспатын Саха сиринээҕи салаата иһитиннэрдэ.
edersaas.ru
Хаартыска: http://Ulus.media